Un’àteru de sos mannos de sa mùsica sarda si nch’est andadu. Bobore Nuvoli, maistru de coro, at lassadu custu mundu pro unu male chi no l’at dadu àtera sorte.
Su diretore, fundadore de su coro Sos Canarjos de Nùgoro, fiat nàschidu in Urtzullei su 4 de martzu de su 1939, e dae minore aiat contivigiadu sa mùsica, finas a devènnere unu de sos mannos de s’iscola nugoresa, maistra de totu sos coros chi cantant a bator boghes de òmine.
At postu cantzones meda, dae S’Aneddu a Su Redentore sighende cun Lamentos finas a Tziu Umberto, e non diat bastare su logu pro las pònnere totu.
In su 2000 in Nùgoro l’ant dadu su rèmiu de Maistru de su folklore, e custu est unu de sos reconnoschimentos chi at àpidu in sa bida sua.
Como isse puru at a pòdere cantare sas laudes de su Segnore in sos artos chelos.
Isse preghet pro sos coristas suos…
