Pro sa tertza borta su Cussìgiu regionale no at presentadu su programma econòmico pro sos annos imbenientes, ma at fatu colare s’esertzìtziu provisòriu, una genia de patu pro sighire sas fainas fitianas in su surcu de su chi ant seberadu sos meses a dae segus, ma sena fraigare lìnias benidoras prus longas. Sa resone, narat s’assessore a su bilàntziu Giuseppe Meloni, est chi non si cheret andare in presse, tantu pro agabbare, ma sa Giunta Todde preferit de si leare unu pagu de tempus in prus pro pensare sas medidas prus giustas e non tècnicas ebbia, ma mescamente de non torrare a fàghere sas faddinas de sa Giunta Solinas.
Sa dereta, dae s’ala sua, giogat una batalla pro fàghere rùere de su totu Todde, dèbile pro sa chistione de sa suspensione de su resurtu de sas eletziones e cun sa minetza de sas votatziones noas chi diant pòdere èssere detzisas dae sos giùighes. In prus su sustegnu populare de sa Presidente est menguadu pro sa chistiones de sos impiantos eòlicos e sa dereta l’impitat pro l’atacare semper prus a forte. Pro custas punnas, Fratelli d’Italia e sas àteras fortzas de cussa parte, sunt pesende cuntierras e istorbos pro arressare sas atividades de su Cussìgiu.
Un’àtera chistione est chi Todde est andende a dae in antis cun sa riforma de sa sanidade sarda. Su setore est de importu mannu, ca in ie bi est sa cantidade de dinari prus manna e fintzas su nùmeru de traballadores prus artu de gestire a manera regionale. No est una chistione petzi de fàghere andare mègius o peus sos ispidales, tando, ma de poderiu. Sa dereta non cheret chi sa manca intret in s’ammanìgiu de sas ASL, reformadas meda dae Solinas, e pòngiat sas persones suas in sos rolos de ghia, mescamente ca b’at sa possibilidade chi si s’at a torrare a sas urnas e, duncas, a mudare totu cantu dae nou.
Gabriele Tanda
Leave a comment