“Riu mannu. The Lan(d)guage Grabbing” de Micheli Ladu. Òpera publicada dae NOR Edizioni in su 2019, colletzione ‘Isteddos’.
− Badore! Oh Badore! − Lisandru aiat iscotuladu, nannighende-lu, sas palas de s’amigu chi fiat imbaradu in su sedile dormende a buca aberta. − A ischidas!
Badore aiat abertu sos ogros e aiat comintzadu a s’ischitzinare sa carena comente chi esseret tentu cosa caminende.
− Bae-ti-nche formigaaa! − aiat tando abboghinadu.
− Macu ses? − l’aiat naradu Manudrota.
Badore aiat abbaidadu cun ogros isbabarriados a Manudrota: − Lisandru… tziu tuo… sa formiga… su feromone.
− Ma ite totu ses varvatende?
− Su pastoriu, sos fogos, sa terra, s’istoria, sa limba. Nche bolent ispèrdere e mòere totu! Bolent sa terra nostra!
E aiat abboghinadu in cara a Lisandru: − Badò, ma ite ses narende!
− M’at contadu totu. Su Lan(d)guage Grabbing Project. M’at postu su feromone in unu lìcuidu grogu!
− Abà pagu pagu. Ma ite t’at fatu tastare unu licore suo?
− Emmo, ma no est licore est feromone de sa formiga!
Lisandru si fiat pinnigadu dae su risu: − Ahahaha, ohi Badore. Giai ti dd’as fata! Ma ite feromone, cussu chi as bufadu est su licore de gentziana chi faghet isse. Cussa pigat a ispistiddadura totu in una. Como apo cumpresu proite no as respostu a su telefoneddu. Nche fia un’ora bona mutinde-ti ca no aias atopadu anco Luisicu. Mincra mia a tue, ma a dd’ischis chi nch’est giai acabbadu su primu tempus de sa partida? Pro una borta chi s’iscuadra de s’ìsula nostra est in una finale europea tue ti cotzeras cun su licore de tziu meu?
− Un’ora?
− Ello. Dae cando nch’at tancadu su Generale!
− Unu cumplotu b’at? Cosa ischis?
− Ma ite, su langabbin… languagging. Cussa casta de cosa chi dd’apo intesu narende a isse? Badore, ascurta a mie. Ti depo iscoviare una cosa: tziu meu tenet unu tumore a cherbeddos. Est malàidu. Abbarrat oras e oras incantadu abbaidende in terra chirchende no isco ite. Nche l’at mandigadu belle totu su Lobo frontale. Pone in mente a mie: non nde contes in giru de custa cosa de su cumplotu ca ti ponent cantzone. Ello terra, limba, fogos e àteru e ite b’at bisòngiu de unu cumplotu? Mira chi in cussu semus bonos nois etotu a lu fàghere de sesi!
Posca Lisandru l’aiat astrintu su coddu: − Pone-mi in mente, nos connoschimus dae una vida, ista-ti mudu e calla-ti. E como ajò ca nch’est giai comintzadu su segundu tempus e semus paregiende. Dae chi nche batimus su tìtulu europeu in s’ìsula!
− Ma sa formiga?
− Cale? Cussa a conca birde de s’àrea Delta? Proite bidu torra nd’as?
− No.
− E tando. Ajò! Semus totus anco Luisicu su Tzinesu. Ti bufas una birra, ti papas unu Livoltinu, ti torrat totu in tzìrculu, nch’ iscèsciase bies chi torras in trassa.
Leave a comment