“Riu mannu. The Lan(d)guage Grabbing” de Micheli Ladu. Òpera publicada dae NOR Edizioni in su 2019, colletzione ‘Isteddos’.
Cussu fiat s’intrada a su magasinu de su Generale. Aiant caladu in una iscalera de perda segada e fiant lòmpidos a unu aposentu mannu cantu a cussu chi teniat in s’intrada de sa domo. In cue in intro bi fiat de totu: mòbiles mannos cun bidros ue bi fiant assentados gipones, gunneddas, vardetas, ragas, cossetes, ispacatròddias, botinos, gabbanos. In subra de sos mòbiles bi fiant màrigas, sciveddas, corbes e àteru. E ue non bi fiant mòbiles e sa pinna de muru fiat lìera bi fiant apicados trivutzos, trìpedes, matzucos, palas, farches, cannisteddas. In un’àteru chirru bi fiant sas carradas prenas de binu e unu muntone de ampullas cun in intro lìcuidu de colores diferentes serente a una mesa cun cassetos.
Leave a comment