“Riu mannu. The Lan(d)guage Grabbing” de Micheli Ladu. Òpera publicada dae NOR Edizioni in su 2019, colletzione ‘Isteddos’.
Aiant coladu in sa bia passu cun passu, che conìllios chi si nche cravant in sas tupas a su prìmu istripìgiu, ghennasdemuru pariant, cando sa bucademele rugrat s’istradone lestra e colobrina, belle ballende a brinchitedos, lèbia che a una Giana de muru, intrende in carchi istampu de muru a bullu.
Gasi fiant issos chirchende carchi gùturinu iscurigosu cando bidiant una lughe essende dae carchi fenestra o intendiant su sonu de carchi motore de vetura arribende dae a tesu.
Aiant fatu unu tretu mannu, iscritu a chie rimas, a chie nùmeros de sa leva, a chie su nùmene de sa bidda cun in fatu “Regna” mancu chi fiant andende a conchistare su mundu, armados de pintzellu e carchina, bajonetas e mitràllias pro iscritas biancas fatas a sa grussa, isparos de isciollòrios e bambìghines de su mamentu. Semper o a conca calada abbaidende su de iscrìere o sinono a conca pesada pro castiare carchi ventana o carchi corridori.
Leave a comment