Podet pàrrere difìtzile a bi crèere, però a praticare “bìculos de ginnàstica” cada tantu in sa die podet megiorare sa salude e s’istadu fìsicu e mentale.
Sos “bìculos de ginnàstica” sunt perìodos curtzos de atividade, dae 30 segundos a màssimu chimbe o deghe minutos, chi pertocant belle cada casta de movimentu. Pensa a artziare in s’iscala, a caminare, a fàghere squat o a ballare.
Sa cosa l’at bogada a campu in su 2007 su cardiòlogu Howard Hartley, chi tando fiat professore assotziadu in sa Facultade de Meighina de Harvard. In die de oe b’at istùdios medas chi demustrant su balore de custos mini- allenamentos.
Paret chi a fàghere esertzìtzios dae 15 a 30 segundos tres bortas a sa die megiorat sos livellos de capatzidade cardiurespiratòria e su rendimentu fìsicu in sos adultos inativos, a su chi narat un’ istùdiu de ghennàrgiu de su 2022 publicadu in sa revista “Exercise and Sport Sciences Reviews”. Sos “bìculos” de custu istùdiu cunsistint in su de artziare in s’iscala e in su de andare in britzicheta.
Sos adultos chi narant chi no aiant s’avesu a fàghere ginnàstica ant tentu unu minimòngiu dae su 17 % a su 18 % in s’intzidèntzia de sos tumores a pustis de àere cumintzadu a fàghere petzi dae 3,4 a 3,6 minutos de atividade fìsica a sa die, cunforma a un’ istùdiu de trìulas de su 2023 realizadu cun 22.398 pessones.
Su profetu de su movimentu pertocat finas sa salude de su cherbeddu. A fàghere un’atividade fìsica moderada o vigorosa cada die, o a annànghere una cantidade minore a su regìmene atuale mìnimat su perìgulu de demèntzia, cunforma a un’ istùdiu de martzu de ocannu in “The Journal of the Post-Acute and Long-Term Care Medical Association”. Cuddos chi in antis no faghiant peruna casta de esertzìtziu ant tentu su profetu prus mannu.
A caminare est una de sas ginnàsticas prus fatziles. Ma non b’est custu ebbia. Pro nàrrere, sas flessiones contra a su muru afortint sos bratzos, cando chi su squat est ideale pro afortire sas ancas. E si cheres artziare in s’iscala sena abbarrare sena alenu, cumintza a artziare e falare in s’iscala unu pagu prus in presse de su normale.
