Sèberos de Sarvadore Serra
leados dae s’òpera Sos vantos de su machine (Stultitiae laus)
de Eràsimu de Ròterdam traduida in sardu dae Albino Pau
e publicada dae Condaghes in su 2009.
Ja est veru chi tue tenes su grabu raru de sa saviesa e pro custu e totu ti piaghet a ti chirriare a parte dae sos sentitos de sa tzentedda de bassa uta, epuru non si potet creder canta durcura e istima tenet su naturale tuo, goi tanta chi resessis, e bi leas gòdiu mannu, a ti ponner semper a paris chin totu.
Pro custu so securu chi custu travaglieddu l’as a retzire non petzi chin piaghere, comente ammentu de s’amicu tuo, ma tambene as atzetare de li dare amparu, ca isse est a tie dicatu e duncas no est prus meu, ma tuo.
Difatis cantu mi timo chi no ant a mancare crìticos alleriatores, chi ant a contularjare chi sunt coseddas de pacu imprastu e pacu dèchitas a unu teòlogu, tropu malas e indechiles a sa umilesa cristiana, e ant a barbuliare chi jeo chèglio torrare a bocare a campu s’antica Cumèdia, o torrare a vita unu tale Lutzianu e assannare a barras astrintas cosas e cristianos.
Leave a comment