Sèberos de Sarvadore Serra
leados dae s’òpera Sos vantos de su machine (Stultitiae laus)
de Eràsimu de Ròterdam traduida in sardu dae Albino Pau
e publicada dae Condaghes in su 2009.
Unas cantas dies colatas fia in viazu dae s’Itàlia a s’Inghirterra. Sicomente non cheria perder su tempus chi mi devia colare a caddu in arrèjonos chene abistesa e chene imprastu, mi fia pessatu de m’apentare chin cosas ch’aerent àpitu unu carchi assimitzu a sos istùdios nostros parinales, e pro aer acunortu chin s’ammentu de sos amicos ch’apo lassatu inoche e chi a sa sapitoria azanghent sa dechitesa de su sentitu. Tra totu custos, a tie, Moro meu istimatu, apo ischirriatu pro primu: e a narrer sa veru, tambene nche istemas a largu s’unu dae s’àteru, in su recreu meledatu dae s’amentu de tene non b’at disvàriu dae cuddu chi fia avesu a gustare canno istaìamus a prope, e ancu m’achirret unu raju si m’est tocata mentzus durcura. E sinnuncas aìapo destinatu de m’apentare in calesiat modu e manera, e dachi s’ora non mi paret cuformata a pessamentos de imprastu, mi fia pessatu de iscrier, gai pro brulla, sos vantos de su machine.
Leave a comment