Benito Urgu, su còmicu de sa cuntemporaneidade

-de Sarvadore Serra-

In su 1964, in sa trasmissione televisiva “Il macchiettario”, nche bòrtulat totu sos ischemas iscontados de sa sardidade isteorotipada: bestidu cun sas bestes traditzionales, paris cun àteros giòvanos, cumintzat cun “A nde cheres de cotzula Jubanna” e nche l’agabbat iscadenendeˑsi in su “Gambale e twist” famadu. Benito Urgu est un’icona de sa comitzidade sarda: e si puru carchi borta, in custas deghinas de annos, est iscàdidu in ischemas ripetitivos, tenet semper unu postu de primore in sa galleria de sos personàgios sardos natzionales populares.

Naschet in Aristanis su 12 de gennàrgiu de su 1939. Issu est tantas cosas postas in pare: cantante, còmicu, cabaretista, cundutore televisivu, iscritore de cantzones, atore.

Cumintzat a fàghere su cantante, cando non tenet galu 20 annos, in su grupu “Gatto Nero ENAL”, chi a pustis de pagu càmbiat su nùmene in “ I nuraghi”. Cun custu grupu cumintzat a s’esibire in sas salas de ballu e in sas pratzas, proponende, in pare cun sos petzos chi cantaiant totus, cantzones sardu-modernas-brulleras iscritas dae issu etotu, comente “ Su twist ‘e Giuannica ” e “Gambale Twist”.

Custa ùrtima cantzone, a pustis de annos, l’ant a connòschere in totu Itàlia cando sa RAI l’at a trasmìtere in su primu canale, e galu como totus podent bìdere in “youtube” cussa esibitzione esilarante chi issu faghet cun su grupu “ I Barrittas”(https://www.youtube.com/watch?v=ojzBwR5xk_0).

Ma s’òmine est eclèticu. No istentat a lassare “ I Nuraghi”e cumintzat a traballare comente presentadore in unu tzircu, in ue imparat sos tempos còmicos e perfetzionat sas capatzidades suas de òmine de ispetàculu; riferendeˑsi a cussos annos at a nàrrere: «Sunt istados s’universidade mea».

In su 1962, a pustis de su servìtziu militare, format su grupu “ I Visconti”: cun custu grupu si marcat a su prèmiu “Arpa d’argento” de Otieri e lu binchet; su grupu partètzipat cun su nùmene nou de “ I Barritas ” e presentat a su cuncursu, paris cun “ Su Twist ‘e Giuannica” de pagos annos in antis, su testu nou “Whisky, birra e Johnny Cola”.

Sos Barritas, insertados in su gènere beat, proponent versiones noas in italianu de testos inglesos comente “Mi appartieni ancora” (“Go Now” de sos “Moody Blues”), “Rhonda, aiuto” (“Help me Rhonda” de sos “Beach Boys”) e una versione de “Sunshine of Your Love” de sos “Cream” (in italianu “Ritorno da te”), branos country–western comente “Arizona” o “Gennargentu” o cun unu sabore prus sentimentale comente “Filo di seta”.

In su 1966 adderint su fenòmenu de sas missas beat e bogant a campu su traballu “ La Messa dei giovani” .

Como sos Barritas non sunt prus unu fenòmenu musicale sardu, ma s’esibint meda in sas tzitades de su Nord Italia, pubblichende àteras versiones italianas de cantzones inglesas, comente “ Al ristorante” (“ Sea of Joy” dei Blind Faith)

In sos annos 70 su grupu de sos Barritas si iscontzat, e dae sa chinisa issoro naschent sos “ Salis & Salis, ” chi s’insertant in su folk-progressivu italianu.

Ma su chi at fatu connòschere a totus a Benito Urgu est su 45 giros “Sexy Fonni”de su 1977, parodia ispassiosa Je t’aime… moi non plus” di Serge Gainsbourg e Jane Birkin, in ue, cun unu “crescendo” esilarante, unu sardu ingenu est seduidu dae una frantzesa alluscada e inganida de sessu; “Sexy Fonni” est istada una de sas resessidas discogràficas prus mannas de su 1977 in Itàlia, otenende su de 8 postos in sa classìfica de bèndidas de sa chida de su chimbe de santandria, su de noe postos in sa chida de su 9 de nadale, e su de 40 postos de sa classìfica annuale.

Pustis, cun sa formatzione musicale “ I Porsei”, Benito faghet cumintzare un’ispetàculu còmicu-musicale itinerante, su primu in Sardigna.

Belle gasi, in s’agabbu de sos annos 70 Benito chircat de si furriare sèriu: iscriet mùsicas e testos de “Su Mummuttone”, unu musical in limba sarda, prima òpera in su gènere suo. Ma se gente est abesada a su cabaretista: s’ispetàculu fatu in s’istàdiu de Nùgoro, in s’istiu de su 1979, no agradat a su pùblicu, e Benito torrat a sas cosas de semper.

Intre su 1984 e su 1992 ponet in iscena una sèrie de ispetàculos de resessida manna: “Visitors”, “Polvere di stelle”, “La Prefica”, “Un giorno in pretura” (chi bidet s’esòrdiu de di Pier Francesco Loche), “Chi l’Ha visto”, “Tonteddu” e àteros; in un’època chi “youtube” est galu a bènnere, cada ispetàculu lu registrant in sos nastros musicales e nde bendent unu muntone de còpias

In custos traballos essint a campu sas calidades suas de caraterista, cun espressiones, maneras de nàrrere, istruturas gramaticales e modalidades de pronùntzia chi sunt in sa làcana intre su sardu e s’italianu regionale, leados dae su limbàgiu de cada die e postos in pare cun un’efetu ispassiosu.

In su 1990, s’intrada in sa RAI: Piero Chiambretti lu cramat a collaborare a su programa assortadu “Prove tecniche di trasmissione”, in Rai 3. S’annu infatu leat parte a “Piacere Raiuno”, ghiadu dae Toto Cutugno, e a sa trasmissione de Rai Tre “La Piscina” cun Alba Parietti. In cussu matessi annu sa regista Anna di Francisca lu cramat a retzitare in sa sèrie TV, produida dae sa RAI e girada in Casteddu, “Casanostra”, cun mùsicas de Alessandro Fois; custa sèrie partètzipat e est seletzionada in unos cantos festival e prèmios (Umbria Fiction, Prix Europa 92, Premio Italia 93, etc); Benito est fintzas coautore e intèrprete de sa cumèdia musicale “Boghes de domo”, produida e trasmissa dae RAI 3.

In su 1997 traballat cun Piero Chiambretti in “ L’inviato speciale”, (RaiUno) e , cun Ambra Angiolini in “ Carosello” (Rai 2). In su 2001 traballat cun Giorgio Panariello a “Torno Sabato”, Rai Uno. Sos duos si connoschiant dae meda; Panariello etotu at naradu chi, cando faghiat su sordadu in Iglèsias e andaiat a bìdere sos ispetàculos de Benito Urgu, fiat incantadu dae su personàggiu, e cando est resessiddu a lu connòschere in pessone, Urgu etotu li cussigiaiat de leare ispuntu dae sos personàgios reales de sa regione sua, sa Toscana, comente faghiat issu cun sos personàgios sardos.

In su 2004 e 2005, torra in televisione cun Piero Chiambretti in “Markette” e “Markette doppio brodo”, in onda su La7; in s’istiu de su 2005, torra in sas pratzas de Sardigna cun s’ispetàculu itinerante “Mattagà”.

In su 2006, incursiones in tv cun Nino Frassica, in antis in su varietè “ Suonare Stella” “ Rai 2”, pustis in “ Colorado Cafè”, “Italia 1”.

In sos annos 2008, 2009, 2010, leat parte a su programa Carlo Conti “I migliori anni ” (Rai Uno) in ue otenet una resessida “fàtzile” cun rapresentatziones istereotipadas chi non lughent pro originalidade

Ma Urgu, in fines, s’aberit fintzas a su tzìnema. In su 2012, traballat in sa pellìcula de Alessandro Capone “E io non pago – L’Italia dei furbetti“. Su 2013 est s’annu de “L’arbitro“, regia de Paolo Zucca, cun Geppi Cucciari e Stefano Accorsi: unu contu surreale ambientadu in su mundu de su fùbalu intre sa Sardigna e s’Itàlia, in ue issu intèrpretat su personàgiu de un’allenadore prenu de ironia e sabiore. In su 2016 leat parte a sa prima pellìcula de sos còmicos sardos Pino e gli anticorpi, “Bianco di Babbudoio”.

Una carriera artìstica longa a beru, in ue un’òmine geniale e originale a bortas at dèvidu mediare cun s’esigèntzia de otènnere su cunsensu de unu pùblicu mannu. Semper e cando, una pessone de tènnere in contu e ammentare.

Ligàmene: https://it.wikipedia.org/wiki/Benito_Urgu

Leave a comment