Cun una mòvida chi at ispantadu gente meda, sa Giunta at cantzelladu su bandu pro dare a sos privados sa compidada contra a sos fogos de sas istradas. Fiat giai totu publicadu, ma s’iscàndalu chi aiat pesadu sa noa intre sos voluntàrios e sas àteras persones impinnadas onni annu contra a sos fogos, at cumbìnchidu su Presidente Solinas a torrare a dae segus. Lampis, s’assessore a s’Ambiente, at naradu chi ant sighidu su chi at pedidu e iscritu su Cussìgiu e chi isse e sa Giunta b’intrant pagu cun sa chistione. In su mentres sos voluntàrios ant dadu sa disponibilidade de lu fàghere issos sa compidada de sas istradas, sena bisòngiu de pònnere in mesu àteros.
Siat comente si siat, fintzas ocannu sa batalla de sos fogos paret agatare sa Regione galu pagu pronta: fogos mannos si sunt acurtziados a biddas e tzitades e sa chistione de su bandu retiradu, iscòbiat chi una faina gasi de importu non fiat galu ammanigiada. Semus andende cara a sas duas chidas prus caentes de s’annu, cun sos sartos sicos pro neghe de duos meses cun paga abba. Isperamus bene.
(redatzione)
Leave a comment