Beatrix Potter in limba sarda

                 Helen Beatrix Potter (Londra, 28 de trìulas  1866 – Near Sawrey, 22 de nadale  1943) est istada un’iscritora, illustradora, sientziada naturale e ambientalista inglesa. Est connota mègius pro àere iscritu contos pro feduliu in ue sos protagonistas sunt animales. Su primu libru,   “The Tale of Peter Rabbit” , l’at publicadu in su  1902. Sas òperas  suas, in ue b’at in totu 23 contos, ant bèndidu prus de 250 milliones de còpias.

                Traduidos in prus de 35 limbas, cun giassos in su “Victoria & Albert Museum” e una Sotziedade dedicada a s’istùdiu issoro, sos traballos de Beatrix Potter podent èssere cunsiderados  in totu clàssicos de sa literadura pro pipios.

             Como est essida finas una publicatzione in limba sarda. Si narat “Piricu Cunìlliu Pilete e àteras contàssias”. L’ant cuidada Stefania Carta e Alessio Pani. Su libru, ingalanidu dae bisuras medas ammajadoras, tenet sas tradutziones in sardu cun sos testos originales in inglesu a costàgiu. B’at finas  sa biografia de s’autora, una galleria de sos personàgios, unu glossàriu inglesu – sardu e notas de tradutzione.

           E gasi, leghende sos contos de Pìricu Cunìlliu, de Meledda Mantziada, de Mastru Grodde e àteros, unu podet, in su matessi tempus, cuntentare sa fantasia sua  e ripassare su sardu e s’inglesu. Un’initziativa editoriale de gabbale, de tènnere a contu.

(sa redatzione)