In su cantu de suta de su Lìbanu b’at sa missione de paghe de s’UNIFIL in ue b’at fintzas sa Brigata Tàtari. Sos sordados contant dae dies intreas chi sos israelianos sunt andende a dae in antis e oramai sunt a curtzu de a beru a sas bases de sos sardos, chi intendent tzocos e chimentu de batalla. E onni tantu carchi restu de mìssile corfat sa caserma. No est un’atacu a sos militares nostros, issos s’agatant in mesu ebbia, ma sa possibilidade chi calicunu si potzat fèrrere, ismànniat die cun die. In totu custu su guvernu non podet fàghere meda: criticare a Trump, a pustis de àere refudadu s’agiudu pro defensare sos navios chi colant dae Hormuz, est a bi brigare e Meloni non lu cheret; a si fàghere intèndere dae Netanyahu est fintzas peus. A su matessi tempus non podet essire dae sa missione de s’ONU, pro acordos e impinnu internatzionales. Comente naraìamus inoghe, su guvernu si cheret in mesu proende a non seberare e sighire a èssere amigu de totu cantos. Tando, sa risolutzione aprovada dae su Parlamentu pro pedire un’amparu prus mannu pro sos militares italianos (leghe inoghe) giai dae como non tenet fortza maicanta.
A un’àtera banda s’Istadu italianu est ismanniende su nùmeru de sas esertzitatziones militares in sas bases sua, chi pro su prus sunt in Sardigna. Sos aèreos sunt gasi fitianos chi su Tzentru Istùdios Agrìcolos at denuntziadu chi su bestiàmene in sos tretos de su polìgonu militare de Cabu Frasca est produende su 20% de mancu. Sas berbeghes, sas bacas e sas àteras bèstias s’assuconant cando colant sos jet militares e a lenu a lenu su late lis s’est assutende. Tore Piana, presidente de su Tzentru, promitet atziones legales si sa situatzione no at a sanare.
Che a semper, su chi acontesset in su mundu lompet in totue e nois non semus diferentes.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment