Bànari est prontu pro s’editzione 2024 de sa Sagra della Cipolla dorata. Sa manifestatzione, dedicada a gastronomia, arte, mùsica e ambiente, est in programma su 20 e su 21 de trìulas, pro more de sa Pro Loco in collaboratzione cun sa Comuna e cun su patrotzìniu de sa Regione.
Sa sagra faghet parte de su tzircùitu Salude & Trigu de sa Càmera de Cummèrtziu de Tàtari.
Sàbadu 20 a sas 11 si partit in pratza Umberto cun sa presentatzione de su libru Grazia Deledda e il cibo, cun s’autore Giovanni Fancello e sa giornalista Sara Chessa.
A mesudie e mesu in pratza della Palma Laboratorio del gusto Doc, in collaboratzione cun Slow Food, cun su coghineri Mauro Solinas, cun una disponibilidade pro 30 persones.
Pro su pràngiu in pratza ant a èssere in bèndida paninos cun sartitza e chibudda arrustida.
A sas ses de sero sa Coldiretti organizat una mesa tunda dedicada a sos produtos de su territòriu. A sas ses e mesu ddo’at a àere un’ispàtziu pro sas erbas, intituladu Erbe in Sardegna.
Su prèmiu Cipolla Dorata di Banari 2024 at a andare, che a semper, a una personalidade famada. Ocannu su premiadu est s’ex giogadore a fùbalu Gianfranco Zola. Sa tzerimònia, a sas sete, previdet s’intregu de un’òpera realizada dae s’artista Giuseppe Carta. Prèmios puru pro sos chi ant valorizadu su produtu e pro sa chibudda prus manna.
A coa ant a abèrrere sos stand enogastronòmicos cun màndigos propostos dae sas Pro Loco de Bànari, Ùsini, Uri, Cherèmule, Tiesi, Portu Turres e Biddanoa e dae su comitadu de Santu Larentzu.
S’inauguratzione at a èssere acumpangiada dae sos cantos de su cuncordu banaresu. Pro finire sa primu die, mùsica cun sos Gonzales dae sas 9 e a coa Dj set cun Martina Cannas.
Domìniga 21 sa segunda die de sa sagra cumintzat a sas oto e mesu cun essidas in mountain bike cun su sòtziu Trumabikers e a pee cun sa ghia de Beniamino Carta.
A sas ùndighi e mesu sos pipios s’ant a pòdere ispidientare cun su laboratòriu de coghina Baby Master Chef. In fines, pràngiu in pratza a mesudie e mesu.
Sa manifestatzione at a tènnere finas una curnisa artìstica: istudiantes de s’acadèmia de Bellas Artes de Tàtari ant a presentare installatziones dedicadas a sa chibudda; Giovanna Licheri at a presentare un’ispàtziu nou dedicadu a s’òpera de Giuseppe Carta, Carta Creations&Design; in prus est in programma una mustra fotogràfica, intitulada Feminas, de Mario Villa e una de pintura de Luigi Carta.
(gianni muroni)
Leave a comment