Aumentos in bulleta chi podent arribare peri a su 200%, ponende in perìgulu, in custu printzìpiu de annu nou, unu pore de aziendas sardas.
Est Confartigianadu Sardigna a dare s’allarme supra sas cunsichèntzias chi su rincaru de s’energia elètrica e de su gas diant pòdere àere pro s’indùstria artesana sarda.
Intre sos setores prus in arriscu bi sunt sas aziendas alimentares e cussas prus minores. Sos miliones de euro in prus de gastu non si depent ghetare a pacare a sos consumidores e pro cussu, denùntziat Confartigianadu Sardigna, giao dae como artesanos meda sunt custrintos a non fàghere ordines noos ca non podent pagare.
Una situatzione metzana chi s’annanghet a una giai drammàtica, cun sas impresas chi sunt gherrende pro nche essire dae s’emergèntzia pandèmica e sas dificultades istruturales de s’imprendidoria sarda.
Pro cussu Maria Amelia Lai, presidente de Confartigianadu Impresas Sardigna e su segretàriu Daniele Serra pedint a su guvernu natzionale de intervènnere ca sos 4 miliardos postos a cùrrere pro minimare su prètziu de s’energia non bastant.
“Est pretzisu chi fatzant cantu prima carchi cosa pro su primu trimestre de su 2022, mescamente pro cussas impresas minores chi ant cuntratos cun una tarifa chi mudat cunforma a su mudare de su mercadu, e pro cussas impresas minores chi ant in cuntratu tarifas fissas e duncas artas meda, – narant sos dirigentes de Confartigianadu – sa situatzione est grave e sas impresas non podent sighire a andare a in antis cun sa timoria de su chi podet capitare in beranu”.
Mariantonietta Piga
Leave a comment