Su Bancu de Sardigna de Tàtari at bìnchidu sa Copa Itàlia de basket de su 2014. In sa finale, in su Mediolanum Forum de Milanu, s’iscuadra chi allenat Meo Sachetti at giogadu contra a sa Montepaschi de Siena de M. Crespi e at bìnchidu 80 a 73.
Est su primu tìtulu pro s’assòtziu tataresu, Siena tzedet sa Copa (a pustis de nd’àere bìnchidu chimbe in fila a pare) a su Bancu de Sardigna chi intrat duncas in s’istòria. “A nche bogare a foras a s’Olìmpia de Milanu nos at missu ànimu meda” at naradu comente est finida sa partida s’allenadore Meo Sacchetti “e semus istados bonos a non tzèdere cando Siena nos fiat ponende suta, e a s’urtimada amus meritadu de bìnchere custa Copa”.
Tàtari at comintzadu bene sa partida, andende subra de 6 puntos (12/18) e serrende su primu cuartu in dae in antis de 4 puntos (14/18). In su segundu cuartu, su tretu intre sas iscuadras creschet e Marques Green bi faghet de assu de mertza (bìndighi puntos in antis de su pasu) e a mesu partida su Bancu de Sardigna est subra de 15 puntos, ma custu puntègiu boliat sos campiones de Itàlia chi comintzant a cùrrere e bi ponent unu 12/0 chi los torrat in intro de sa partida. (47/50).
Ma sos tataresos si rebellant e mescamente cun Gordon e Dienet torrant a fàghere unu sulcru intre sas duas iscuadras, finas si como sa partida est prus gherrada. Cando bi cheret ses minudos a agiustare, Tàtari est galu subra de 10 puntos, e gasi e totu a chimbe dae sa fine. Su tretu creschet, cando Brian Sacchetti signat su puntu chi nche giughet su Bancu a subra de dòighi.
E Siena non bi la faghet prus a tènnere a su Bancu, finas a su 80/73 de sa fine de sa partida.
Sa Dinamo, e totu sa Sardigna, est in s’istòria.