«Su nostru est unu resurtadu de importu pro una lista nàschida pagu prus de unu mese e mesu a como. Comente amus naradu e torradu a nàrrere in ocasiones medas, custa campagna eletorale pro nois est petzi su primu chilòmetru de una maratona in pessu cumintzada». Gasi sa prima boghe Anthony Muroni cummentat su resurtadu de sa prima proa eletorale de AutodetermiNatzione, sa lista chi ponet in pare pro sa prima bia sas siglas istòricas indipendentistas e autonomistas isulanas. «Pro nois sas polìticas italianas non fiant sos 100 metros, e mancu s’ùrtimu chilòmetru de sa maratona. Pro nois fiant su cumintzu de unu caminu longu. Pro como faghimus sos augùrios a sos 5 isteddos. E mescamente a sos sardos».
«Sa Sardigna at espressadu unu plebiscitu pro su Movimentu e, a sighire, pro Salvini. Sos sardos – inchietos, e cun resone, cun Pd e Forza Italia pro sos disacatos de sos ùrtimos 25 annos – no nd’ant chertu s’intesa. Nen pro su chi pertocat sas capatzidades de sos candidados grillinos delegados a nos rapresentare in Roma, nen pro su chi pertocat s’inutilidade sustantziale de sos votos sardos in sa padedda manna italiana. Difatis sos votos isulanos no ant istesiadu nudda. E s’Itàlia, in sustàntzia, at a èssere inguvernàbile, comente amus chircadu de crarire in sa campagna eletorale»,sighit Muroni, «cando chi teniamus s’ocasione de creare sa chistione Sardigna».
«Progetu Autodeterminatzione at bogadu a campu unu mètodu, una retza, un’organizatzione, grupos de traballu. Su de custu mese est unu caminu fatu mescamente dae sos tantos “carrabusos”, comente deretu ant cumintzadu a si fàghere mutire sos ativistas e sos amparadores nostros. Sunt issos sa fortza nostra. Sunt sas pessones, pro su prus pitzocos, chi ant istudiadu sas problemàticas de su territòriu, chi ant fatu propostas, chi ant ammaniadu eventos e ant cramadu sos candidados in su territòriu. Sos candidados e sos carrabusos no ant curtu sos chentu metros ma una maratona. Ant cumintzadu cun seriedade e impinnu su primu chilòmetru, sena fàghere cumprumissos cun sos partidos italianos, sena bèndere sos printzìpios , sena si lassare andare a ratzismos e cualuncuismos
AutodetermiNatzione at a torrare a mòvere dae sos territòrios, forte de su resurtadu otentu eris e de sa gana sua de sighire a s’ impinnare in su fràigu de sa “chistione Sardigna”, cunforma a sos modellos corsicanu e catalanu.
“Semus giai traballende – congruit Muroni – in pare a sas mìgias de sardos chi nos ant dadu cunfiàntzia. E a sas àteras mìgias chi ant promissu de nos la dare in s’imbeniente”.