Un’àteru annu in Europa. Una mail chi est arribada eris a borta de die at asseguradu chi sa Dìnamo Bancu de Sardigna at a leare parte annoas puru a s’Eurocup, sighende su chi annu passadu fiat acumpridu chene su tempus, ma cun divagu mannu siat pro su pùblicu tataresu, siat pro s’Uleb chi at carculadu meda s’organizatzione de sa sotziedade sarda.
Su de nch’essere bogada in sos cuartos, aiat fatu a manera chi sa Dìnamo no aeret dèvidu leare parte a s’Eurocup, ma in su mese de maju sa sotziedade at presentadu rechesta de una wild card pro pòdere partetzipare su matessi. E eris est arribada sa cunfirma ufitziale: annoas puru su bancu de Sardigna at a giogare in Eurocup in s’istajone isportiva 2013-2014.
“Est una cosa manna pro nois” at naradu su presidente Istèvene Sàrdara “ca est unu prèmiu pro su chi amus fatu in sa manifestatzione passada, difatis sa pòrroga positiva est arribada in antis de agiustare sos campionados natzionales. Capatze chi annoas s’Eurocup la ghetent a pare cun s’Eurochallenge, e b’apat duncas prus iscuadras, ma a nois nos ant atzetadu in antis de narrerent -totu a intro- e duncas cheret nàrrere chi sunt cuntentos de bi giogaremus, e de custu nos nde podimus petzi bantare”
Su de giogare una copa europea, est de importu ma cheret finas nàrrere chi bi cheret unu roster chi siat ampru e de calidade puru, ca finas sos play-off a su bator s’est bidu cantu sunt dificultosos, e cherent afrontados.
“S’isetu de annoas” concruit Sàrdara “non mudat: est su de giogare sos play off”
de Jorgi Rusta