“Tocat de nch’essire dae sos caminos de s’istòria chi s’imparat in iscola, tocat de ischire chi b’at un àtera istòria a banda de sa de sos libros de iscola” at naradu Sergio Milia ,Assessore de sa Cultura de sa Sardigna presentende sa Die de sa Sardigna 2013, e at sighidu: “como nois non semus pro nche catzare a nemos, ma punnamus chi sa gente bèngiat a connòschere sos logos nostros”.
E galu: “Ocannu a tìtulu amus seberadu SA DIE DE SA CONNOSCHÈNTZIA, SA DIE DE S’IDENTIDADE, SA DIE DE SA SARDIGNA, a connòschere, a ischire est una chistione de importu mannu, nos faghet crèschere, sa limba sa cultura nostra nos faghent persones lìberas chi podent seberare mègius comente tzitadinos e comente comunidades”
In custa die s’ammentat chi su pòpulu sardu, chi a pustis de àere gherradu contra a sos frantzesos pro difèndere sa Sardigna est andadu a rechedere deretos a su Re Savòia e isse no nde lis at cuntzèdidu, s’est irvortadu e nch’at catzadu su visu re e sos piemontesos, in sos bèsperos sardos der su 28 de abrile de su 1794.
Est de importu a èssere pòpulu sardu, a mantènnere e difèndere s’identidade pro si cunfrontare cun su mundu chi punnat semper de prus a abbatzigare sas minorias: tocat de tènnere semper in sa mente e in su coro sos valores de sa cultura de sa limba e de s’identidade finas e mescamente in una sotziedade che a sa nostra, semper prus multiètnica e multiculturale.
“Oe sa Sardigna”-at concruidu Cappellacci – “est torrende a agatare un’identidade de pòpulu, e custu cumbinat in unu momentu de crisi e de dificultade. Tocat de èssere aunidos: gente e istitutziones, tocat de rugrare totus sas bandas pro su bene de sos sardos, ca una Sardigna chi s’est irvortada contra a sos abusos est capatze de lu torrare a fàghere