Sa testimonia sotziale de Anthony Muroni

-de Giuseppe  Pepe Coròngiu –

massimumuroni

A sa fine est istada una bella festa. Anthony Muroni sàbadu a mangianu coladu at organizadu un’addòbiu in su teatru Màssimu e at postu a disponimentu de sos sardos s’esperièntzia sua. Sala prena, ispetàculu garantidu, regia perfeta. Su mistèriu, chi faghiat parte de s’istrategia comunicativa, s’est acraridu in pagas chistiones.

Su giai diretore de s’Unione Sarda, ponet a disponimentu unu blog www.anthonymuroni.it, pro sighire a resonare de Sardigna, de sos problemas suos, de su tempus benidore. Est finas in sardu, una novidade galana. Una proa de impitzu sotziale de ammiru. L’ant fatu cumpangia 9 testimòngios de sa sotziedade tzivile, belle 500 persones presentes e 1000 collegadas in direta facebook.

Chie fiant sos testimòngios? Paolo Pillonca, Pepe Corongiu, Anna Maria Busia, Filippo Martinez, Piero Marras, Daniela Ducato, Giovanni Dore, Lucia Tidu, Alessandro Spano e Michela Murgia, chi pro resones personales fiat ausente. B’aiat finas fortzas polìticas medas: Stefano Tunis (Forza Italia), Claudia Zuncheddu (Sardigna Libera), Pierfranco Devias (Liberos), Gavino Sale (IRS), Christian Solinas (Psd’Az), Gianluca Collu (Progetu Repùblica Sardigna), Gesuino Muledda (Rossomori) e Massimo Dadea (ex assessore della Giunta Soru), totu Sardigna Natzione. E militantes de custos e àteros partidos. “E b’aiat unu muntone de gente comuna – at decraradu Muroni a s’Ansa- chi mancari no andat mancu a votare: deo dia chèrrere a agiuare custos mundos a s’acarare intre issos pro agatare issolvidas chi podent èssere de megioru”.

Est unu traballu de primore chi mustrat s’umanidade e sa capatzidade de s’òmine e su fatu chi est una resursa pro una Sardigna chi est chirchende su ite ite fàghere e comente si nche mòere in custos annos de disisperu. Sa boghe de Muroni, chi giai comente diretore de L’Unione Sarda, aiat mustradu cantu fiat a cunsonu cun sa Sardigna, non s’at a istudare né at a iscumpàrrere.

E custu, de sesi, est giai unu fatu deghile e de ammodu. E tando non si cumprendet reatziones iscumpudidas e negativas chi amus bidu mescamente in Facebook.

Mi pregonto: chie est timende?

Un’esponente de primore de sa classe dirigente, giai direttore de su giornale prus mannu, cònvocat sos amigos e comunicat chi cheret sighire a si impitzare de Sardigna cun su chi ischit fàghere mègius: informare, interpretare, arresonare, comunicare cun sa gente. Lu faghet sena pedire nudda in càmbiu si non partetzipatzione democràtica.

Lu faghet finas in sardu pro sos sardos cun ispìritu disinteressadu e patriòticu. Lu faghet pro su megioru e crèschida de sa Sardigna sena nudda de balangiare e totu de pèrdere cun sa polìtica politicante chi est pronta a lu matzare.

massimumuroni2Non cumprendo sas timorias, sas crìticas prevènnidas, sas ironias, s’atragàgiu a un’òmine lùghidu chi bi ponet sa cara e non si cuat. Est sa testimonia mègius chi una sotziedade tzivile podet disigiare. Una testimonia rivolutzionària: de cuddas rivolutziones beras, cussas chi si faghent cun su traballu de cada die. Chi ant dura e gente chi las sighit.

Mi pregonto duncas: chie timet custa positividade?

7 Cummentos

  1. Pisu Paolo says:

    De Antony Muroni tengio unu bellu arregodu, po sa gentilesa gi ada tentu cun i sindigus de is comunus pitius comente Laconi e po ai mustradu su coraggiu de chistionai de is problemas gi teneusu in Sardigna. Mi dispraxidi ca no seo poziu andai.

    Cun saludi. Paolo Pisu.

  2. Beppe Perra says:

    Nci sunt cuddus chi timent de distruere su campixeddu suo de ortalitzia e atrus chi traballant pro mantennere su status quo. Is primus sunt una richesa si si ponent in conca de essere prus de bonucoru pro sa terra insoro e sperare de ddus ghiare a s’ala nostra; is atrus sunt de batallare e de distruere politicamente

  3. mi dispiaghede de non bi essere annadu,ma niunu m’at nadu nudda.Forsis ca non apo ” mastigadu sardismu e indipendentismu” assumancus cantu sos chi bi fini presentes.Pero fatto sos augurios pius caros a su Direttore pro isboligare in su mezus modu sa chistione.
    Bachis Morittu

  4. Gigi Camba says:

    Complimentus meda a Anthony Muroni po cussu chi ha fattu de direttori de s’ Unione Sarda po difendi is dirittus de is sardus senza de fai scontu a nisciunus e senza condizionamentus policus. Deu du stimu meda!

  5. Apu incontrau Anthony Muroni in santu Basili, po sa campagna de su No, po salvai sa costituzioni.M’est praxiu comenti at fueddau,m’est patu stranu chi essit fueddau sa lingua de giornali chi faiat campagna po su Si. Dopu apu iscipiu chi no est prusu direttori de cussu giornali chi mai hat difendiu is interessus de sa Sardegna e de is sardus. Ndi seu prexiada….Seu diventada una amiradora de custu omini giovunu ma sabiu….Ligiu cun prexeri tottu su chi publicat in su blog. Speru una bella di de liggi ca s’est candiadau, seu pronta a du sustenni…

  6. 3347427278 says:

    Avrei voluto partecipare

  7. Gianfranco Omar Meloni says:

    casteddu ch’est a largu e b’at ateru ite achere. Ma depo narrer chi mi paret zustu de dare a Muroni su valore chi li tocat…pro mene no est unu periculu…no est de timere; a su revessu naro chi est un’ omine, unu sardu de valore chi potet esser capatze da aunire totu sas animas de s’indipendentismu sardu…..pro si poter cunfrontare totu paris chi su guvernu italianu; Un’omine chi potet dare gana de bi creder a totu cussos chi an lassatu sa politica e no andana a votare.

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com