S'arrestu de Wadi'a

S’arrestu de Wadi’a

Chistionare de gherra dae logos de paghe est difìtzile, ca s’arriscat de nche rùere in sa retòrica o in sa cundenna sena connòschere sas realidades. Ma s’arriscu b’at de si lu pigare cando sos mèdios massivos mustrant su prantu de unu pitzinneddu de 5 annos trasinadu cun su babbu dae sos sordados.

Est su chi est capitadu martis coladu in Hebron a Wadi’a, unu pipiu palestinesu, faltosu de àere tiradu a pedra contra a sos sordados israelianos, chi l’ant arrestadu a curtzu de sa Tumba de sos Patriarcas e pigadu in machina in una caserma israeliana, paris cun su babbu Karam, chi in sa caserma matessi est istadu bendadu e presu cun sos ferros.

Sa denùntzia est istada fata dae B’Tselem, su tzentru de informatzione israelianu chi gherrat pro sos deretos umanos in sos Territòrios Palestinesos e chi est faghende girare su vìdeo de s’arrestu in sos mèdios massivos de totu su mundu.

Sena fàghere arrèsonos meda in subra de sa polìtica israeliana e de sas cuntierras palestinesas, su chi tocat su coro est su prantu e su disisperu de cussu piseddu (o creaduredda, ca a chimbe annos galu creadura est!). E sa domanda chi naschet est: ite neghe nd’at unu pitzinnu de chimbe annos?