Su mese de làmpadas pro chie l’agradat su mercadu de sa botza est a su sòlitu su mese ue acumprint sos cuntratos de sos giogadores, e si podet fàghere carchi negòssiu bonu sena ispèndere nudda, o a istracu baratu.
In unu situ Tuttocagliari.net ant proadu a assentare una listra de giogadores chi diant pòdere èssere de profetu pro su giogu de su Casteddu, sighende sos ruolos e s’ischema chi impreat s’iscuadra de Pulga e Lopez.
Portieris.
Agazzi paret chi si nche devat andare; in parte sua duos nùmenes: Pegolo de su Siena, chi mancari mannitu at fatu unu campionadu bonu finas si nche sunt abbassados a Sèrie B. Si si diat chèrrere leare unu portieri dae sa Sèrie B unu nùmene est Alex Cordaz, portieri de su Cittadella, chi a pustis de annos meda in B paret prontu a ampilare a Sèrie A.
Tertzinos.
Sos difensores destros de su Casteddu sunt unu mesu rebus: Pisano est galu istropiadu, e Perico non cumbinchet de su totu. De sos chi agiustant como su cuntratu b’est Nicolas Frey, giogadore de importu e seguru, chi a su tratu punnat a rennoare cun su Chievo, e Ferronetti, chi est giai annos meda chi est gioghende gasi gasi. Abbaidende in Sèrie B b’est Baldanzeddu, cumpàngiu de Sau in sa Juve Stabia, e diat èssere un àteru sardu in prus. Tocat a dare cara finas a Ceccarelli, apompiadu finas annu passadu.
Murru e Avelar diant dèvere abarrare e duncas paret difìtzile chi su Casteddu comporet unu giogadore pro s’ala mànchina; tocat de signalare a Jokic, de su Chievo e a Renzetti, giogaiat in su Pàdova e l’est chirchende finas su Parma.
Defensores tzentrales.
Si moet Astori, tocat a comporare unu tzentrale che Deus deleghesit, sarvu si chèrgiat puntare subra de Ariaudo. S’esseret, giogadores de leare podent èssere Cesar de su Chievo, e Rodriguez de su Torinu.
Tzentrales de mesu campu.
Petzi unu bi nde podet mòere e est Nainggolan, e in parte de su belga, o si bi comporat calicunu de balore, o si ponet a giogare calicunu de sos chi bi sunt in s’iscuadra (Ekdal, Cabrera, Erikson, Casarini). De sos isvinculados in Sèrie A bi nd’at belle pagos: in sèrie B unu nùmene podet èssere su de Barillà: cursa e purmones pro su Casteddu.
Esternos, mesa puntas.
Mancari nàschidu in Roma su giogadore prus guladu in custu ruolu est unu sardu de ratza: Sestu, sa mesa punta at giogadu unu campionadu bonu meda cun su Siena e como in su mercadu de sos isvinculados est de sos prus chi ant a chircare. Un’àteru negòssiu bonu si podet fàghere cun Schiattarella, 26 annos, una bida in sèrie B 150 partitas e 12 retes.
Puntas
Non bi nd’at meda puntas chi ponent in motu sa fantasia: Christodolopoulos est galu a rennoare cun su Bologna, est unu giogadore bonu, ma sunt prus sas bortas chi no lu mustrat chi non sas chi lu mustrat. Una punta imbetzes chi l’iscadit su cuntratu bi l’at su Casteddu, e Nenè si nche diat dèvere andare. Difìtzile chi in parte sua b’arribet carchi giogadore betzu che a Toni, Rocchi o Saha.
de Jorgi Rusta