– de Sarvadore Serra –
S’autismu est unu disturbu de s’isvilupu caraterizadu dae problemas in s’ interatzione sotziale e in sa comunicatzione, e dae unu cumportamentu limitadu e repititivu. Sos babbos e sas mamas a su sòlitu si nd’abbìgiant cando su fìgiu tenet prus pagu de tres annos. Sos sìntomos a s’ispissu si manifestant in manera graduale. Ma b’at pitzinnos autìsticos chi lompent a sos traguardos de s’isvilupu a unu ritmu normale e pustis peorant.
S’autismu est causadu dae una cumbinatzione de fatores genèticos e ambientales. Su perìgulu podet bènnere dae sas infetziones chi una fèmina podet leare cando est prìngia, comente sa rubella, o dae su fatu chi cando fiat prìngia at assuntu àtzidu valpròicu, alcool o cocaina. S’autismu pertocat s’elaboratzione de sas informatziones in su cherbeddu, alterende sa manera chi sas tzèllulas nervosas e sas sinapsis issoro si connetent e s’organizant. Ma non s’est cumpresu bene comente acuntesset totu custu. Cunforma a su DSM-5 (Diagnostic and Statistical Manual of Mental Disorders, Fifth Edition – Manuale Diagnòsticu e Istatìsticu de sos Disturbos Mentales, Edizione 5), s’autismu faghet parte de s’ ispetru autìsticu (ASDs), gasi comente sa sìndrome de Asperger, chi est prus pagu grave, e su disturbu pervasivu de s’isvilupu no ispetzificadu in àtera manera (PDD-NOS).
Si si intervenit deretu in su limbàgiu e in sos cumportamentos si podent agiuare sos pitzinnos autìsticos a otènnere cuidadu de sesi, abilidades sotziales e capatzidades comunicativas. Mancari non bi siat una cura connota, b’at àpidu casos de pitzinnos chi sunt sanados dae custu disturbu. Non b’at autìsticos medas chi vivent in manera indipendente cando si faghent mannos, ma calicunu bi resessit.
Sos indivìduos autìsticos podent tènnere formas medas de cumportamentu repititivu o limitadu, chi sa “Repetitive Behavior Scale-Revised” (Iscala agiornada de su cumportamentu repititivu) at classificadu in custas categorias:
-
Cumportamentos istereotipados: movimentos repititivos, comente iscùdere sas manos, fàghere isconchinadas, o fàghere chindulare sa carena.
-
Cumportamentos cumpulsivos: cumportamentos chi rechedent tempus e punnant a reduire s’ ansiedade, chi unu sugetu si intendet custrintu a sighire in manera repititiva o cunforma a règulas fissas, comente a pònnere ogetos in un’òrdine particulare, a controllare sas cosas, o si sabunare sas manos.
-
Monotonia: resistèntzia a su cambiamentu; pro nàrrere, insìstere in su fatu chi sos mobiles non siant istesiados o a si refudare de èssere interrutos.
-
Cumportamentu rituale: modellu invariàbile de sas atividades de cada die, comente a mandigare semper sa matessi cosa o a sighire unu rituale cando unu si bestit. Custu est ligadu in manera astrinta a sa categoria de sa monotonia.
-
Interessos limitados: interessos o fissatziones chi sunt anormales in su tema o in s’intensidade de sa focalizatzione, comente cando unu si interessat tropu a unu programa televisvu particulare o a unu giogu particulare.
-
Autolesionismu: Cumportamentos comente a s’istritzare sos ogros, a si nche tirare sa pedde, a si mossigare sas manos e a iscùdere sa conca.
Sos cumportamentos repititivos e autolesionistas non sunt ispetzìficos de s’autismu. Ma cando b’est custu disturbu sunt frecuentes e graves.
Pro tempus meda s’est pensadu chi b’at una càusa comuna a livellu genéticu, cognitivu e neuronale pro sos sìntomos caracterìsticos de s’autismu. Como, imbetzes, sunt cumintzende a pensare chi si tratat de unu disturbu cumplessu in ue sos elementos printzipales tenent càusas distintas chi non semper sunt totus presentes.
Custu disturbu tenet de seguru una base genètica forte. Ma sa genètica de s’autismu est cumplessa e no est craru si si tratat de mutatziones raras cun efetos importantes o de interatziones multigènicas raras de variatziones genèticas comunas. Sa cumplessidade naschet dae sas interatziones intre genes diferentes, s’ambiente e fatores epigenèticos chi non càmbiant su secuentziamentu de s’ ADN ma si podent eredare e influèntziant s’ espressione genètica. Genes medas sunt istadios assotziados cun s’autismu gràtzias a su secuentziamentu de sos genomas de sos indivìduos interessados e de sos babbos e mamas issoro.
Dae unos cantos annos est essidu a campu unu movimentu pro sos deretos de sos autìsticos, chi punnat a otènnere prus tolleràntzia cun chie tenet custu disturbu. S’idea est a lu cunsiderare comente una diferèntzia e non comente una maladia, e a otènnere “atzetatzione, non curas.” B’at eventos mundiales medas cun custa punna, comente World Autism Awareness Day, Light It Up Blue, Autism Sunday, Autistic Pride Day, Autreat. E b’at fintzas assòtzios comente Autism Speaks, Autism National Committee, Autism Society of America.
Sos mèdia ant tentu un’influèntzia manna in sa manera chi sa gente bidet sas pessones autìsticas. Rain Man, una pellìcula chi at bintu 4 Oscar, tenet comente protagonista un’autìsticu, interpretadu dae Dustin Hoffman, cun talentos e abilidades chi sunt una cosa de non pòdere crèere. E non depimus ismentigare sa sèrie televisiva reghente The good doctor, chi contat s’istòria de unu chirurgu giòvanu cun sa sìndrome de su savant. Su fatu istat chi, si su prus de sos autìsticos non tenet abilidades particulares, bi nd’at tzertos chi otenent resurtados bonos a beru in su campu issoro.
Ligàmenes:
https://en.wikipedia.org/wiki/Autism
https://ca.wikipedia.org/wiki/Autisme
https://it.wikipedia.org/wiki/Autismo
Leave a comment