Iscobertos evangèlios in sardu de Simon Mossa. In Tàtari e S’Alighera duos addòbios

de Domitilla Mannu –

IMG_1562

S’Assòtziu culturale “ Pro no ismentigare “ at ammaniadu duas Cunferèntzias intituladas “Antoni Simon Mossa, poeta e artista de cultura europea e mediterrànea”. Su progetu est istadu aprovadu dae sa Regione e ammaniadu sighende sos inditos de su bandu  de su 2013 pro  “ Manifestatziones de ammentu de pessonazos protagonistas de s’istòria e de sa cultura de sa Sardigna”, sas comunas de Tàtari e de S’Alighera ant cuntzessu s’amparu.

Antoni Simon Mossa, est istadu una bandela pro su movimentu pro sa defensa de sas limbas e de sos diritos de sas minorias linguìsticas. At intregadu sa vida sua pro afirmare custas ideas, chi ant ischidadu in sos sardos sa cussèntzia de èssere unu pòpulu chi tenet diritu a s’autodeterminatzione ca tenet totu sas caraterìsticas, linguìsticas,istòricas e culturales chi lu distinghet dae s’Itàlia, duncas totu ideas chi si sunt abberadas in sas cumbatas de sos movimentos linguìsticos e/o indipendentistas dae 40 annos a como.

In custos ùrtimos annos sa famìlia, chi costoit s’archìviu suo, at agatadu iscritos isconnotos, intre sos cales, una tradutzione in sardu de sos Evangèlios e àteros documentos in sardu e in aligheresu chi testimoniant de sas relatas chi at tentu cun intelletuales nòdidos europeos e màssimu a totu, cun rapresentantes de sa minoria linguìstica catalana. Sas duas Cunferèntzias sunt, duncas,  s’ocasione pro connòschere mègius sa figura de cust’òmine de gabale de sa terra nostra e sos reladores nd’ant a faeddare a fine  in sardu e in s’aligheresu, sas limbas chi li fiant prus caras.

Sos adòvios s’ant a tenner chenàbura 7 de sant’Andria in S’Alighera a sas h. 16,30 in sa Biblioteca Comunale “Rafael Sari” pratzita S. Chiara, e giòbia 13 de sant’Andria in Tàtari a sas h. 16,30 in sa sala de s’Assessoradu a sa Cultura in Largu Infermeria S. Pedru.

Domitilla Mannu

 

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*