In Tàtari, tècnicas modernas pro s’ictus.

de Sarvadore Serra

 

 

In sa clìnica universitària de Tàtari e, in particulare, in s’unidade  operativa cumplessa (Uoc) de chirurgia vasculare ghiada dae Eugèniu Martelli, ant adotadu  una tècnica noa pro sa preventzione  de s’ictus cerebrale. Su mètodu,  chi li narant «pro eversione», est  a s’avanguàrdia in totu su mundu.

«S’ictus ischèmicu, est a nàrrere s’infartu de una parte de cherbeddu, – crarit Martelli, chi ghiat s’iscola de ispetzializatzione  in chirurgia vasculare – est una cunditzione destruidora  chi ponet in pelea mescamente sos antzianos. Est sa prima càusa de invalididade permanente, ca podet chèrrere nàrrere  sa paresi de unu bratzu  o de un’anca, sa pèrdida de sa paràula o de sa capatzidade  de cumprensione de su  limbàgiu de sos àteros, e est sa de tres càusas  de morte in su  mundu».

«Belle su mesu de sos atacos de ictus ischèmicu – agiunghet – est causadu dae placas  ateroscleròticas mannas chi, creschende  a bellu a bellu ma in manera progressiva in intro de sas  artèrias caròtides  de su tzugru chi giughent su sàmbene  a su cherbeddu, nde podent minimare s’aportu de sàmbene netzessàriu e duncas  podent cajonare totu in unu sa sufferèntzia ischèmica».

«Custas placas – ispetzìficas – si podent asportare chirurgicamente cun duas tècnicas alternativas: su mètodu cunventzionale o su mètodu pro eversione. Sa tècnica cunventzionale – ponet in craru Martelli – cumportat s’abertura longitudinale de s’artèria caròtide.  Sa tècnica pro  eversione, imbetzes, cumportat  sa setzione neta de s’artèria caròtide sighende  unu paris  inclinadu: sa placa est asportada iscugugende  su mutzu de caròtide in artu e sa cosidura de s’artèria si faghet  in manera direta in su mutzu  de caròtide in bassu, illadiende s’artèria in manera naturale cun una tècnica chirùrgica adeguada. Su profetu prus mannu de sa Tea carotidea pro eversione – congruit Martelli – a cunfrontu de cussa  cunventzionale – est chi garantit de prus  sa perviedade de sa caròtide in su  tempus».

Ligàmenes: http://www.lanuovasardegna.it/sassari/cronaca/2018/04/11/news/prevenzione-dell-ictus-cerebrale-metodo-rivoluzionario-a-sassari-1.16700252

http://www.ansa.it/sardegna/notizie/2018/04/11/ictus-cerebralenuova-tecnica-chirurgica_77c14051-cfbf-4c1c-b2c2-db74eca5e7e1.html

http://www.clinicacellini.it/cure/trombo-endo-arterectomia

http://www.medicalcontrol33.it/tag/ictus-cerebrale/

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com