CSU in Roma pro defensare su sardu in Rai

Custu mèrcuris,  in Roma, in sa Presidèntzia de su Cussìgiu de sos Ministros, Dipartimentu Afares Regionales, de seguru ant a faeddare  de sa chistione de su sardu chi non si podet impitare in sa Rai. Su Coordinamentu pro su Sardu Ufitziale, pro mèdiu de su representante suo Pepe Coròngiu, at fatu ischire chi leat parte  in sa cunferèntzia  “Sa diversidade linguìstica in Itàlia: unu patrimòniu europeu’, cunvocada dae su sutasegretàriu Gianclaudio Bressa, responsàbile de sas minorias linguìsticas  de su guvernu Gentiloni. Sa reunione ministeriale, chi bi partètzipant sos rapresentantes acreditados  de totu sas minorias linguìsticas  italianas reconnotas, l’at cherta cun fortza e l’at otenta  su responsàbile de sa  Cunfederatzione Minorias Linguìsticas Domenico Morelli.

 

Un’apuntamentu istraordinàriu a unos 11 annos de distàntzia de s’ùrtima cunvocatzione chi serviat a fàghere su resumu (de seguru non bonu) de su sardu e de sas àteras limbas reconnotas dae sa lege istatale  482/99. “S’apellu fatu eris dae su cussigeri RAI sardu Franco Siddi – at craridu Coròngiu, giai diretore de su Servìtziu  Regionale Limba Sarda – chi denùntziat sa voluntade  de s’azienda televisiva istatale de tasire sa programatzione in sardu giai istabilida  dae su guvernu, at cambiadu  sa situatzione e rechedet un’interventu urgente. Amus a pesare sa chistione  durante sa cunferèntzia  e amus a chircare de  mobilitare totu sos polìticos sardos. Non damus  unu giudìtziu  positivu de cantu at fatu fintzas a como sa Giunta Pìgliaru, ma in sa  capitale italiana depimus  reagire totu paris”.

 

In sa cunferèntzia ufitziale de sas minorias, chi la faghent, in Roma cras su 22 de santadria, in via della Stamperia n.8 , inche su Dipartimentu Afares Regionales e de sas Autonomias  dae sa 10 de mangianu, b’at in programa  su saludu de su  cussigeri Antonio NADDEO, Capu de su  Dipartimentu pro sos afares  regionales e sas autonomias, e sa relatzione introdutiva de su  cussigeri Saverio LO RUSSO, Coordinadore de s’Ufìtziu  IV – Ufìtziu pro sos afares giurìdicos, sas autonomias locales, sas minorias linguìsticas  e sa comunicatzione.  Pustis ant a intervènnere, pro sas minorias reconnotas:  Francesco AZZALINI, Walter BANDELJ, Giampiero BOSCHERO, Bojan BREZIGAR, Giuseppe CORONGIU, Antonella D’ANTUONO, Ksenija DOBRILA, Ernesto LIESCH, Giacomo LOMBARDO, Vito MASSALONGO, Domenico MORELLI, Carmelo Giuseppe NUCERA, Massimiliano PACHNER, Silvano PALAMA’, Rudi PAVSIC, Velia PLOZNER, Fernanda PUGLIESE, Federico VICARIO. Sunt istados cumbidados  fintzas unos cantos parlamentares e esponentes polìticos istatales e regionales.

 

Perunu cummentu

  1. …Su de no reconoscher sa minoridade linguistica nostra, es de facto, un’afirmatzione de non apartenentzia a sa com unidade italyca, e una ” larvata ” ammissione de non ytalianidade… In pratica Nos kerene solu pro su ki lis faket comodu e pro ch’isticchire sos venenos de ontzi calidade… No Nos cussiderana minimamente Dignos si no che a Esser Futtidos…. Itte n’dre nades a lis fagher CAMBIARE IDEA ???

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*