– de Bovore Mele –
In Còrsica natzionalistas e indipendentistas ant bintu sas eletziones territoriales. Presidente est Gilles Simoni chi in sa prima faeddada sua ufitziale at ammisturadu frantzesu e corsicanu. Presidente de s’Assemblea Regionale est Jean Guy Talamoni, de Còrsica Lìbera, chi in sa prima setziada at faeddadu totu in corsicanu. Forsis pro fàghere su guvernu ant a serbire finas sos votos de sa manca de Giacobbi, chi at guvernadu finas a eris, ma si podet nàrrere chi sos natzionalistas aiant giai bintu sa batalla de s’egemonia culturale in sa sotziedade corsicana. Aiant difatis custrintu sa manca a fàghere una polìtica linguìstica de primore. Inoghe publicamus unu cummentu de Bovore Mele.
—————————————————————————————————————————————–
Unu guvernu nou imbeniente in Còrsica de pustis de sas eletziones de su trèighi de Nadale 2015 est determinadu dae su fatu chi in Ajaccio oe b’at unu Cussìgiu Regionale rennoadu e in totu diferente meda dae su betzu in Còrsica. Difatis e non pro nudda intitulaiat su diàriu de s’ìsula “Corse Matin” s’incràs de sas eletziones “Pe a Storia” istramudende su nùmene de sa coalitzione “Pe a Còrsica”.
Semus siguramente cara a unu risultadu istòricu. In su Cossigiu nou sos iscannos sunt 24 pro sos natzionalistas corsicanos de Gilles Simeoni, 12 pro s’ischerra de Paul Giacobbi costituida dae sos radicales de ischerra e dae sos comunistas de Duminique Bucchini, eurocomunista e giai sìndigu de Sartena, 11 pro sos republicanos, sa dereta, de Josè Rossi e 4 pro sa dereta estrema de su Fronte Natzionale.
Sas duas coalitziones chi ant pigadu prus botos in sa legisladura colada aiant guvernadu paris. Gilles Simeoni est fintzas sìndigu de Bastia e est fintzas su fìgiu de Edmond Simeoni, chi nch’at norant’annos e est galu de bonu sentidu e est su lìder istòricu natzionalista. Diant’eris Edmond Simeoni at fatu unu comitziu in pratza in Bastia e maniestende una lughidade de conca chi est semper un’ispantu pro un’òmine de cuss’edade at faeddadu giustamente fintzas issu de unu risultadu istòricu pro sa Còrsica.
Issu at fintzas annanghidu una cosa chi medas ant giai naradu fintzas in Sardigna est a narrere ca sa vitòria ideològica de sos natzionalistas est arribada in antis de sa vitòria eletorale, bastat a pensare a cantu sos natzionalistas apant influidu in pitzu de sos seberos de s’amministratzione corsicana. Edmond Simeoni aiat fundadu in sos annos setanta de su sèculu coladu s’Unione de su Pòpulu Corsu chi s’ispiraiat a su Partidu Sardu de Atzione. Gilles Simeoni su presidente in pectore oe faghet un’apellu a sos deputados singros pro aere unu guvernu chi fatzat s’interessu de su pòpulu corsicanu e mancari pro averguare gasi si bi reventet a ischirriare calicunu cussigeri dae sas àteras coalitziones de apartenèntzia. Sa cosa prus lògica diat essere pro unu chi abbàidat dae s’esternu chi si torret a unu guvernu de sos natzionalistas cun s’ischerra cun sa presidèntzia de s’esecutivu corsicanu dada a sos natzionalistas est a narrere a Gilles Simeoni.
Ma propriu in custas oras una peschisa de sos giuges de Ajaccio at interessadu su diretore generale de su Cossigiu Regionale corsicanu su dutore Thierry Gama Martini pro tzertos arredos in ue b’est su suspetu chi apat fartzadu sos atos pùblicos a profetu de impresàrios o fornidores amigos de Paul Giacobbi cun su cales custu est amigu corale. Una de sas fortzas noas chi prus ant contribuidu a sa vitòria de sos natzionalistas est sa Gioventude Natzionalista, giobanos a in tundu de trinta annos, chi sunt pagu in cherta de cumpromissos cun sos radicales de ischerra ca los giudicant clientelares.
B’at de narrere ca in Còrsica ant guvernadu fintzas a eris fortzas polìticas chi àplicant sa solidariedade republicana contra de sas fortzas estremas in su sistema polìticu frantzesu. In Còrsica de custu non si nde faeddat craramente, ca esistit verdaderamente sa preminentzia ideològica de sos natzionalistas, ma custu non cheret narrere chi sos partidos de madrighe frantzesa suta suta non chirchent pro cantu possibile unu cras a una “conventzio ad escludendum” contra de sos natzionalistas chi giugat a sas eletziones antitzipadas.
Ma giòbia su 17 de Nadales sos natzionalistas bi sunt revèntidos a eleghere su capu de s’Assemblea Regionale Guy Talamoni de Còrsica Lìbera, natzionalistas de ischerra, chi at fatu unu discursu in Limba Corsicana e su Capu de s’Esecutivu Gilles Simeoni de Femu a Còrsica, natzionalistas de tzentru. E a gasi sa Còrsica dat borta a su fògiu de s’istòria.
Leave a comment