Chie at istudadu su blog de Jasmin Efte?

– de Domitilla Mannu –

Isfahan-830X370px

Isfahan, Iran

Jasmin Efte est una poetessa e iscritora iraniana chi sigo dae pagos meses in Facebook legende sos iscritos suos in sa pagina “Alba Persiana.” Dae annos est giughende a dae in antis una cumbata culturale pro sos deretos sotziales e de sas fèminas, pro chi potant esser prus lìberas. Est laureada in “Limba e Literadura Inglesa,” istat in Isfahan una tzitade in su tzentru de s’ Iran e at imparadu a sa sola s’italianu. Vivet servada dae sas autoridades de guvernu chi, unos cantos annos como, l’ant fatu serrare su blog chi pro issa fiat una ventana aberta a su mundu e unu mèdiu pro faeddare de sa realtade de sa terra sua chi, no semper, est mustrada cun sintzeridade.

In un’intervista at naradu: “A pustis de aer faeddadu in una ràdiu italiana m’est bènnida a conca s’idea de abbèrrere unu blog in italianu pro cumpartzire sas esperièntzias, sos pessamentos e sas timorias mias cun àteras pessones e mescamente cun sos italianos, ca mi sento a curtzu a sa cultura italiana, apo cumpartzidu puru cosas bellas, festas e eventos, ca sa vida est fata de cosas bellas e feas.”

Legende su chi iscriet si cumprendet cantu siant fortes e fungudos sos cumbinchimentos suos. Issa disigiat sa paghe e narat chi ebbia s’amore batit amore e duncas custu sentidu cheret bene semenadu in sa vida nostra e in su mundu, cun totu sas pessones, sena distingher ratza, colore de pedde e religione, ca si, a s’imbesse, semenamus òdiu amus a incungiare àteru òdiu, chi s’at a tramudare in gherras e terrorismu.

arte persiana1486741_817936984916672_7811840054926636760_n

 Su de contare de sa terra sua, de sa sotziedade, de sas isperas de libertade de sa gente, est sa manera fitiana de gherrare contras a su poderiu polìticu-religiosu, e pro more de custu pagat a caru in carre sua, onzi borta chi l’arrestant. Ma Jasmin est forte, non timet e non si rendet; sa fortza sua la testimòniat, l’iscriet e la cantat, custos sunt versos chi ponent marrania a chie la persighit. Acò una poesia sua:

 

Non mi pones prus timòria caru ditadore
inserra-mi puru in sa presone prus orrorosa
ma cheret chi iscas però
chi onzi borta chi as a aberrer
su balconitu de sa tzella mia

tue as a bider

iscurigore e tristura
imbetze deo ap’a bider
ebbia lughe e ispera.
E ite naras
chie de nois
at a viver peus?

Jasmin Efte dae s’8 de martzu no at iscritu prus in Alba Persiana e su profilu FB non si bidet prus, l’ant fata cagliare un’àtera borta. E nois podimus istare indiferentes a dae in antis de sos poderes chi ochient sa boghe de sos poetas?

Domitilla Mannu

https://lapoesiaelospirito.wordpress.com/2013/12/10/jasmin-efte-blogger-iraniana-poesia-ed-impegno-civile-nella-lingua-di-dante/

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*