Catalugna, binchet s’indipendentismu

de Sarvadore Serra

Nen sa presone, nen s’esìliu, nen su cummissariamentu  de s’autonomia, nen sa tzensura, nen sa campagna mediàtica, polìtica, politziesca  e giuditziale  ispagnola ant bintu s’indipendentismu in Catalugna. Cun una partetzipatzione istòrica, chi non s’est bida mai, de prus de su 80%, sas tres fortzas indipendentistas sùperant sa  majoria assoluta: “Junts per Catalunya”, cun su presidente Carles Puigdemont, isfaulàrgiat sos sondàgios  e devenit  sa prima fortza  indipendentista, cun 34 iscannos, sighida  dae ERC –cun su capu de lista, Oriol Junqueras, in presone–, cun 32 iscannos. Sa suma de sos 4  diputados  de sa CUP assegurat sa majoria assoluta e rendet inùtile  sa prima positzione  de Ciutadans, chi, cun 36 iscannos, at  acaparradu sa  majoria de su votu  unionista, in dannu mescamente  de su  PP, chi, cun 3  diputados, resurtat  unu partidu de pagu contu  in Catalunya. “Catalunya en Comú” at peoradu  su resurtadu de “Catalunya Sí que es Pot” de su  2015, e est coladu dae  11 iscannos  a 8.

Su PSC de su 155, chi cun Miquel Iceta aiat pesadu isetos eletorales mannos, at otentu petzi  unu diputadu in prus  de sas votatziones de su 2015. In fines , su blocu  de su 155 at otentu 57 iscannos, a cunfrontu de sos  70 de s’indipendentismu.

Totu sas fortzas indipendentistas sunt essidas  a festare  su resurtadu de sas votatziones , si sunt cumplimentadas a pare e ant revindicadu  sa legitimidade  de su guvernu  atacadu  dae s’esecutivu  de Rajoy.

Ligàmene: https://www.vilaweb.cat/noticies/catalunya-derrota-el-155-de-rajoy-i-lindependentisme-revalida-la-majoria-absoluta/

 

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com