Brave, eOs, Akasha, Status, nùmenes noos in su mundu informàticu.

– de Sarvadore Serra –

Brave, eOs, Akasha, Status…pro letores medas custos nùmenes galu non cherent nàrrere nudda. Ma podet dare chi in pagu tempus ant a intrare in parte de Chrome, iOS, WhatsApp o Twitter. Sunt sa leva noa de istrumentos de internet.

Totus tenent su matessi naturale: narant chi cherent torrare a una retza informàtica umana. Sunt in favore de sa privadesa e contra a sos monopòlios. Non punnant  a sustituire in manera direta sos istrumentos mannos  de   internet chi bi sunt como. Però tenent su potentziale pro su lu fàghere.

Issos moent dae sa crìtica a comente funtzionat como sa retza informàtica. Google, Apple, Facebook, Amazon, Uber o Netflix ant creadu impèrios mannos ponende retzas privadas  subra de un’infrastrutura pùblica chi dòminant  imprenditorialmente  e tecnologicamente. Sa resposta a totu custu  est su recùperu de s’ autonomia personale e colletiva pro mèdiu de retzas  chi si fundant  in sa cadena de blocu  e in sa criptografia. In unu venidore pro nudda a largu, sos telefoneddos criptados, sa regorta de datos  in  VPN (Virtual Private Network – Retza Privada Virtuale)  e sas  criptomonedas ant a cambiare sa manera de fàghere sas cosas  tantu comente l’ant cambiada Google o WhatsApp. Però, isetende a bènnere custa die, b’at giai aplicatziones  prontas  pro funtzionare  in custu cuntestu, chi cumintzant a èssere bidas comente  s’alternativa a sos nùmenes mannos de sa retza. Bos presentamus sas prus de importu.

Navigadore: Brave contra a Chrome
Su navigadore  est galu su traste  fundamentale  de  internet, e Chrome de Google nche colat de meda cale si siat àteru cumpetidore. Brave paret su primu chi arribbat cun sas règulas  de s’ internet noa. Issu narat a sos impitadores chi non sunt unu produtu, e custu est in cuntierra cun sa cosa prus criticada  de Chrome, su fatu chi collit  sos datos de sos impitadores pro si los bèndere. Brave tenet unu controllu mannu subra de totu cussas cosas  chi non si bident cun fatzilidade, comente  sos cookie o sas insertziones, chi si podent blocare sena problemas. Tenet aplicatziones  comente sa capatzidade  de fàghere micropagamentos a sas retzas informàticas chi si preferint. In prus, est lestru meda. Pro como si podet agatare  in versiones pro  Windows, Ubuntu-Debian o MacOS, cun s’interfaghe  petzi in inglesu.

Regorta de datos: Storj o IPFS contra a Google Drive o Dropbox
Sos impitadores  de internet  si sunt avesados  in una manera ispantosa  a lassare totu sos datos personales  in sa chi li narant ‘nue’, chi est in manos de sas cumpangias mannas. Su modellu  de regorta detzentralizada, meda prus seguru pro sa privadesa, est essidu a pìgiu cun progetos  comente  Storj o IPFS.

Storj si presentat comente una prataforma detzentralizada in ue si podet archiviare su chi si cheret, paghende petzi su tràficu chi gènerat o s’ispàtziu de discu chi impitat, sena cunditziones  de impreu mìnimu o de pagamentos periòdicos. Però sa cosa prus de importu  est su sistema  de privadesa, chi faghet a manera chi petzi s’impitadore podet intrare a sos archìvios suos.

IPFS, comente acuntesset in àteras aplicatziones chi amus mustradu, no est un’ alternativa direta a Dropbox o Google Drive, ma unu cuntzetu nou, chi punnat a intrare in parte  de unu de sos elementos fundamentales  de internet, su protocollu HTTP

Messageria: Status contra a WhatsApp
Sa messageria instantànea est devènnida  unu de sos servìtzios prus impitados in su mundu. WhatsApp, chi apartenet a Facebook, ghiat custu segmentu tecnològicu. Paret chi Status siat s’alternativa prus probàbile, si b’at cunditziones in favore.

De fatu, est meda de prus de unu servìtziu de messageria. Si presentat comente unu sistema operativu cumpletu, chi non solu permitit  de imbiare  cummentos a sos cuntatos,  ma cunsentit cada casta de interatzione, fintzas de imbiare diretamente dinare  dae una pessone a s’àtera.

Retzas sotziales : Steemit o Akasha contra a  Facebook   e Twitter
          Sas retzas sotziales  sunt istadas su terrinu prus profetosu de internet in custos ùrtimos annos, ma fintzas su chi at creadu prus problemas. Sas cuntierras  de Facebook sunt lòmpidas  a sa polìtica mundiale e Twitter at pèrdidu sa fama sua de neutralidade  –pro nàrrere, s’Úndighi  de Cabudanni de su 2018 at cungiadu  pro unas cantas oras  su contu de VilaWeb cando fiat cumintzende sa manifestatzione,  e galu no at craridu pro ite.

In custu mamentu, sas alternativas prus praticàbiles si narant Steemit e Akasha.

Ambas duas si presentant comente retzas sotziales detzentralizadas. Steemit arribbat fintzas a pagare  sos membros suos si pùblicant cuntenutos bonos meda. Akasha si presentat comente una retza chi si interessat meda  a sa libertade de espressione, a sos deretos umanos e a gherrare contra a su controllu de s’informatzione; tenet duas aplicatziones, una de internet  e una de iscrivania, chi però rechedent connoschèntzias tècnicas mannas  pro las fàghere funtzionare; galu no est pronta pro un’impitadore normale. Steemit, in càmbiu, si faghet servire dae una pàgina informatica sena peruna cumplicatzione particulare. Est craru chi peruna de sas duas si podet paragonare,  comente nùmeru de impitadores, a sas retzas soziales atuales, però sos espertos las cunsìderant sas alternativas mègius, si bogant profetu dae sas crìticas a sos sistemas traditzionales.

Sistemas operativos: eOS e Essentia, contra a iOS o Android
Custa undada noa de internet  est minetzende fintzas  sos sistemas operativos totupoderosos comente iOS, Android, Windows e Linux. eOS e Essentia como parent sos progetos prus avantzados.

Essentia si podet allùere in cale si siat aparatu connessu a sa retza, e medas de sas aplicatziones  chi amus mentovadu in custu artìculu si podent impreare cun fatzilidade. Custu faghet a manera chi giai dae como siat un’alternativa, mancari chi su nùmeru de sos impitadores non si podat paragonare a su de sas prataformas cummertziales de como.

S’àteru sistema operativu, si gasi si podet nàrrere, giai avantzadu meda, est eOS, fàtzile de impitare e in fase de proa

Ligàmene: https://www.vilaweb.cat/noticies/els-substituts-de-chrome-ios-twitter-o-whatsapp-ja-son-aqui-brave-eos-akasha-status/

 

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*