S’isport che a unu mèdiu de solidariedade: est s’idea de sos chi ant ordimingiadu sa manifestatzione “Sa partita de su coro. Unu gol pro unu risitu. Agiua·nos fintzas tue”. Domìniga, su 16 de làmpadas, prus de chentu giogadores diletantes de fùbalu ant a leare parte a custu addòbiu pro agiuare un’atleta giòvanu chi at dae pagu iscobertu de tènnere una maladia mala.
Cras, in su campu comunale “Tonino Cossu” de Torpè s’ant a disafiare, a manera isportiva e cun amistade manna, sas iscuadras de Terranoa (su capitanu est su torpinu Gianluca Siazzu) de Torpè, e una ALL STAR, rapresentativa cun giogadores de sas iscuadras de Pasada, Budune, Nuorese, Thiniscole e Santu Diadoru.
Su torneu est ammaniadu dae sa sotziedade “Torpè Calcio” e dae totu sos àteros sòtzios de sa bidda baroniesa: pro more de sa solidariedade de sa gente e de sos butegheris de sa bidda s’ant a pòdere istrangiare sas sotziedades isportivas chi ant a leare parte a custa diada de benefitzèntzia.
Sa punna est duncas sa de collire dinari pro su giòvanu malefadadu e mustrare chi sos balores de s’isport s’intritzant bene cun sos balores de sa solidariedade e de sa bida.