Nàschidu bìndighi annos a como cun sa punna de cumpartzire un’idea poètica de su mundu movende dae su bisòngiu de nche barigare làcanas geogràficas, mentales e cuntzetuale, torrat su fèstival literàriu internatzionale “Ottobre in poesia”. E si sa de s’annu coladu l’apronteint in memòria de Jack Hirschman e de Pierina Cilla a pagu tempus dae sa dispedida issoro, ocannu s’at a festare sa faina literària de unu grandu poeta sardu: Giuanne Fiore de Ìtiri Cannedu. S’apuntamentu cun su maistru est programmadu pro su 23 de santugaine, in bidda sua. «Su sentidu fundudu de sa diada – narat su diretore artìsticu e fundadore de su fèstival, Leonardo Omar Onida – movet dae una batalla nostra personale e istòrica: sa de ondrare sos poetas, sos babbos de sa cultura sarda, sende issos bios». Giuanne Fiore, classe 1935 in s’anàgrafe e operaja in coro, sabidoria massajina, vocabulàriu vivente dae sos sartos pro sos sardos, manos de terra e limba chi tuddit, poeta sindacalista. Poeta cun sa poesia in intro e pro totu cantos semus, pro cungiare s’arresonu. Sa diada est organizada in tres tempos: un’atopu a sas 10.30 de mangianu cun isse etotu, poeta e òmine (e cun Anna Cristina Serra, Attilio Mastino e Salvatore Ligios); sas istatziones poèticas a sas 5 de merie peri sa bidda itiresa; galu leturas a sero in teatru a sas 19.30 cun Clara Farina. Ma su fèstival no est petzi su 23 e no est in Ìtiri ebbia. S’editzione de ocannu comintzat in Tàtari su 20 cun sa poeta gallesa Menna Elfyn; sighit su 21 in Tissi cun Antonella Iaschi e una diada in ammentu de Peppino Impastato e de Fabrizio De Andrè; su 22 tapa in Turalva cun Anna Utopia Giordano, Franca Pirisi resada dae Clara Farina, Christine De Luca e su tenore de Bitzi. In programma finamentas mustras colletivas e laboratòrios cun sos pitzinnos de sas iscolas.
màuru piredda
Leave a comment
Bellu meda! Ite lastima a non b’essere! Peruna possibilidade de “streaming” pro chie no est in Sardigna?