Fintzas a sas oto de sero de su lunis imbeniente si podent intregare sas listas de sos candidados a sas eletziones de su 25 de cabudanni. Amus giai faeddadu inoghe de su PD chi at agatadu un’acordu. Oe si sunt acraridas fintas sas ideas de chie b’at a èssere in cussa de su Movimento cinque stelle e de sa dereta.
A pustis de sas parlamentàrias, su chimbe isteddos ant cunfirmadu su chi s’ischiat: in Sardigna a ghiare sa lista pro su Senadu at a èssere Ettore Licheri, pro sa Camera Alessandra Todde. Àteros nùmenes connòschidos sunt pagos e benint pro su prus dae s’esperièntzia polìtica de custos annos: tando bi sunt Emiliano Fenu e Susanna Cherchi chi sunt istados senadores, ma fintzas sa sìndiga de Assèmini, Sabrina Licheri, e Gianluca Lai, su vitze sìndigu de Carbònia. Unu seberu fatu, dae Conte e dae sos eletores, pro premiare sa lìnia de su presidente de su Cussìgiu betzu.
In sa dereta sos cràstulos sunt agabbados e s’inghitzat a bìdere carchi piessignu. Sos nùmenes sunt totu connotos: Ugo Cappellacci, Pietro Pittalis e Carlo Doria, su senadore nou de sa Lega. Intre custu partidu b’at una cuntierra intre duos: su coordinadore Dario Giagoni o s’assessore a sos Trasportos Giorgio Todde pro su cullègiu de Tàtari? Àteru nùmene de importu est cussu de Andrea Biancareddu, assessore de s’Istrutzione, chi at collidu dae pagu s’erèntzia de Giorgio Oppi.
Como chi sas ideas sunt craras, amus a bìdere si s’at a incumintzare a faeddare de polìtica e de Sardigna.
(redatzione)
Leave a comment