Su 4 si festaiant sas fortzas armadas, In Casteddu est bènnidu fintzas su Presidente de sa Repùbblica, cun carchi ministru, sordados medas, sas fretzas tres còlores e sos ammentos corales de su sacrifìtziu de sos sardos pro fraigare sa pàtria italiana. Sardos maicantos fiant festende in paris cun issos, e comente a su sòlitu àteros sardos fiant fatu a sos polìticos de fora pro pedire e alabare, alabare e pregare. Como chi sa die nòdida est colada, lompent noas de unu mese, su de santuandria, prenu de esertzitatziones militares chi pertocant totu sa Sardigna.
Totu est inghitzadu cun unu sutamarinu a giru pro sa costera orientale de sa Sardigna, cun avisos chi non fiant craros: perìgulu, ma forsis nono. Como b’at s’ufitzialidade: esertzitatziones chi ant a andare a dae in antis finamentas a su 30 de su mese. Dae su 16 de santugaine b’est istada s’esertzitatzione de sa Nato, chi como est agabbada, cun bombarderis, aèreos de àteras genias, ma sena iscopiare bomba peruna. S’àtera operatzione est de sa Marina italiana finas a su 17 de custu mese e chi at a leare su mare sardu ma fintzas cussu de su sud Itàlia. A pustis at a abarrare sa proibida de traballare in su mare e de bi colare, ma pro esertzitatziones genèricas.
(redatzione)
Leave a comment