Atacu a sas istitutziones brasilianas

Sàbadu mìgias de manifestadores de sa dereta brasiliana ant ocupadu sos palatzos de sas istitutziones in Brasìlia. Un’atacu contra a su presidente Lula pigadu a su poderiu a pustis de eletziones chi sa comunidade internatzionale at atzetadu e las at reconnotas vàlidas. Sas persones chi ant partetzipadu sustenent Jair Bolsonaro, su presidente de dereta chi at pèrdidu, ma chi no at mai decraradu sa bìnchida de s’aversàriu. S’atacu no at àpidu efetu perunu, prima de totu ca Lula non fiat in sa tzitade. Però at ammustradu carchi cosa de sa situatzione de su Paisu de su sud Amèrica.

Sa politzia militare, chi a s’ispissu impreat sa violèntzia finas pro acontèssidas piticas, no at mòvidu un’òrmina de resistèntzia contra a sos manifestadores. Los at acumpangiados in una passigiada in sos Ministèrios sena los atacare, ma fintzas no at permìtidu violèntzias medas. Analistas de giudu narant chi cussa fortza sighit a dare sustentu a sa dereta e contra a sas fortzas de sa manca istitutzionale e chi custa paret una minetza. Custu est unu problema mannu de Lula chi como depet isòrvere.

Sa dereta prus niedda de su Brasile est prus dèbile de cantu si pensaiat. Un’atacu chi no est faddidu in totu, ma chi no at àpidu efetu perunu, ca sas fortzas de s’esèrtzitu non si sunt pesadas contra a su presidente e at acraridu chi Bolsonaro est abarradu a sa sola. Pro custa resone, posca de s’abbolotu, cun una còntiga ligada a sa salude sua, si nche est fuidu in sos USA, chi però giai dae como parent chi non lis cherent dare amparu. Gasi Bolsonaro est in chirca de otènnere sa tzitadinàntzia italiana – pro su sàmbene, ca unu giaju suo fiat italianu – e in custa manera “torrare” in Itàlia o giùghere carchi garantzia in prus dae sa giustìtzia brasiliana.

(redatzione)