Allevare, cummertzializare, promòvere su porcu de ratza sarda e sos produtos derivados pro chistire sa biodiversidade de sa Sardigna pedinde sa collaboratzione e isfrutende s’esperièntzia de sos ristoradores. Custu s’obietivu de s’addòbiu ammaniadu in Nùgoro dae s’Assotziu Allevadores de sa Regione Sardigna, chi at registradu e promòvidu su marcu 100% Produtu Suinu de Ratza Sarda, s’ùnicu originàriu de Sardigna.
Su presidente de s’assòtziu, Luciano Bacchitta, at espressadu cuntentesa manna ca sunt medas sos allevadores chi ant detzisu de pesare custa casta de porcos, chi garantint una filiera controllada dae s’azienda a sa mesa. Petzi sos allevadores iscritos a s’ANAS, s’Assotziu Natzionale Allevadores de Porcos, e a AARS Sardigna podent allevare custu porcu chi depet aere piessignos particulares certificaos. Sos istùdios tzertìficant chi su porcu de ratza sarda si connoschet dae su tempus nuràgicu: semus faeddende de unu porcu chi paschet su prus iscapu, minoròngiu, a tudda longa, una giua a tzufu, origras pendende, una coa longa caddina.
Si perdet in su tempus s’arte, in sas famìlias, de massarizare su porcu a su tempus suo, est a nàrrere in ierru, sa die de sa Purissima, pro àere sa provista de ògiu porchinu e de lardu totu s’annu. Cussa matessi arte chi commo s’acatat in sos produtos a marcu 100% Porcu de Ratza Sarda. Produtos chi sos ristoradores ant a bogare a chie si setzet in mesa, chi non sunt petzi clientes ma òspites, pro cumpartzire una filosofia de su manigu chi contat una traditzione de sabores e ischire millenària.
Marintonietta Piga