Sa bidda de Artzaghena sighit a ammentare a Lucio Tummeacciu, maistru organista mortu in su 2021, cun su Festival Internatzionale Organìsticu chi dd’est dedicadu. Sa manifestatzione, cun sa diretzione artìstica de Giulio Gelsomino, est lòmpida a sa de tres editziones e at a cumintzare su 5 de santugaine.
Sunt in programma tres cuntzertos, totus in sa crèsia de Santa Maria de su Nie. S’oràriu est a sas oto e mesu de seru e s’intrada est de badas.
Sa primu die, su 5, sonat su maistru organista Arturo Barba, de Valentza, Ispagna. Professore in su cunservatòriu de sa tzitade sua, in ue at istudiadu, collàborat cun sa Orquesta de Valencia e sa Orquesta de la Comunitat Valenciana. At a sonare mùsica de Johan Sebastian Bach, de Pachelbel e de Martin y Coll, Cabanilles, Rodriguez Monllor.
Su 12 imbetzes sonat Chiara Imbasciati, flautista. At cumintzadu sos istùdios musicales in Varese e collàborat cun sa setzione giovanile de s’orchestra Filarmònica Europea. Proponet sas sonatas n. 5 e n.12 de Benedetto Marcello e in prus mùsicas de Händel e de Carl Philipp Emanuel Bach. Dd’at a acumpangiare a s’òrganu Giulio Gelsomino. In prus sa flautista at a sonare unu cumponimentu pro flàutu iscritu aposta pro s’ocasione dae su cumposidore aligheresu Riccardo Collu.
In fines, su 19 s’at a esibire Olivier Penin. Frantzesu, at cumintzadu a sonare a pipiu, a s’edade de chimbe annos. Dae su 2004 est organista in sa basìlica de Santa Clotilde de Parigi, in ue sonat s’òrganu fatu in su 1859 dae Aristide Cavaillé-Coll, cunsideradu su mègius organaru de su de deghennoe sèculos. S’esibitzione sua est dedicada a Johan Sebastian Bach, cun sa Piece d’orgue BWV 572 e sa Toccata e fuga in re minore BWV 565, cun in prus trascritziones, semper de Bach, calicuna fata dae Penin etotu.
S’òrganu de sa crèsia de Santa Maria de su Nie dd’at fatu in su 2021 s’artesanu trentinu Paolo Ciresa.
(gianni muroni)
Leave a comment