Est un’atividade de importu mannu sa chi est cumentzende in custas dies in s’Archìviu de Istadu de Nùgoro: difatis, pro mores de unu finantziamentu prevìdidu dae sa lege 482 de su 1999, aberit s’Isportellu de sa Limba Sarda.
Unu servìtziu pro sos utentes chi ant a pòdere impitare finas in sardu sas cumbènias chi frunit s’Archìviu de Istadu de Nùgoro.
Sa diretora Angela Orani at presentadu su servìtziu cuntenta manna, cunsiderende·lu unu mèdiu nou chi faghet a manera de crèschere su chi proponet s’Archìviu.
S’isportellu at a abèrrere dae su lunis a sa chenàbura dae sas deghe a sa una a parte de mangianu, e at a èssere contivigiadu dae Mariantonietta Piga e dae Gianfranca Selis.