Forsis est galu chitzo a nàrrere chi s’amore intre sa Silicon Valley e su Pentàgonu est eternu. A su nessi non cun totu cantos. Anthropic, una de sas printzipales aziendas de su setore AI, at detzisu de intregare unu bellu nono a Pete Hegseth sas chidas coladas. Su Segretàriu de sa Difesa, cun su garbu de chie costumat a dare òrdines a unu plotone de esecutzione, aiat postu un’ultimatum dignu de una pellìcula de su palinsestu annos ‘90 de Italia Uno.
S’ammonestu fiat pagu prus o mancu custu: «Dage·nos su sistema AI bostru intro de chenàbura (su 27 de freàrgiu, ndr) a sas 17:01 o bos nd’impudades». In curtzu, su Pentàgonu cheriat sas craes de su còdighe sena cunsiderare s’assentu èticu de s’azienda. E difatis su Ceo Dario Amodei at rispostu cun unu sulenu e firmu No. Ca narat chi Anthropic serbit petzi a gestire documentos e non pro sa gherra, e chi duncas tzertos impreos ponent in perìgulu sos valores democràticos.
Tantu pro cumprèndere sa natura de s’amministratzione Trump (sa matessi chi at comintzadu a bombardare s’Iran cando galu sas partes fiant chistionende), su boss de sa Domo bianca est intervènnidu “a ruche e a crastu” un’ora in antis de s’ultimatum: «Sos istados unidos de amèrica – leghimus in su social Truth, e traduimus boghende·nche su caps lock – mai ant a permìtere a un’azienda de manca radicale e woke de nos nàrrere comente su nostru grandu esèrtzitu depat cumbàtere e bìnchere sas gherras! Custa detzisione tocat a su cumandante in cabu».
Duncas, ite at fatu custu cumandante in cabu? «Òrdino a totu sas agentzias federales de sessare deretu cada impreu de sa tecnologia de Anthropic. Non nd’amus bisòngiu, no la cherimus e no amus a fàghere prus afàrios cun issos». Su cuntratu de 200 milliones? Brusiadu. Su fatu est chi como Anthropic est in càusa cun su Pentàgonu. De prus: Anthropic in custas dies est registrende un’aumentu de sos download cun cuotas dae su +37 a su +51% cada die, binchende in s’immàgine e in su mercadu. Pagu cosa, tando, sa pèrdida (provisòria, isetemus comente finit sa càusa). A bortas, a nàrrere chi nono cumbenit.
Gianfranca Orunesu
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22