Fata bi l’ant. A pustis de un’annu e mesu de cassa (custu est su tèrmine chi prus de cale si siat àteru amus lèghidu che chi esseremus faeddende de sirbones), chirchende·lu in totue e cun grandu mobilitatzione de sa giustìtzia, Gratzianu Mesina s’est rèndidu custu note. Sas noas chi sunt essende a campu in custas iscutas sunt prus chi no incumpletas, bortas meda mancat su logu in ue nche l’ant tentu. Sa Nuova Sardegna faeddat de su cuadòrgiu suo in Dèsulu, in domo de amigos. De prus ant a nàrrere in cunferèntzia de imprenta, sos chi l’ant tentu, sas oras imbenientes. In Casteddu. Mesina est un’òmine in sos 80 chi, nointamen s’edade, fiat cunsideradu finas a eris, est a nàrrere in antis de èssere arrestadu, unu intre sos ses latitantes prus perigulosos de Itàlia. In su mese de trìulas de s’annu coladu si nche fiat fuidu. Fiat su die in antis chi sa Cassatzione cunfirmaret sa cundenna (àteros 24 annos in intro) pro tràficu de droga. In custos meses de blitz ispetaculares contados·nos che chi aeremus bisòngiu de unu revival literàriu, b’at àpidu chie at sighidu a piscare dae sas abbas de sas fainas de Gratzianeddu e b’at àpidu chie s’at pregontadu cantu potzat èssere de giudu sa possibilidade, pro sa sotziedade intrea, chi un’òmine nche torret a presone a 80 annos de edade. Ite b’at a abarrare? Pro seguru carchi “meme” bambu che ludu e perunu àteru meledu.
redatzione
fonte immàgine Agi
Leave a comment
No est una chistione de “cantu potzat esser de giudu”; Mesina est unu criminale, fintzas tropu santificau dae medas cunterràneos, e tando giustu est chi si c’andet a galera, comente sa lei at cunfrimmau. E lestru puru, no siat chi si che fuet un’atera borta.