Su yoga est una disciplina hindu ispirituale e ascètica, chi tzertas pràticas suas, comente su controllu de su respiru, su meledu e unas cantas posturas corporales ispetzìficas, est meda profetosu a las sighire pro abbarrare sanos e pro si rilassare; su nùmene benit dae su sànscritu e cheret nàrrere literalmente ‘unione’.
A si podet impitare su sardu pro praticare su yoga? Eja, comente pro totu sas àteras cosas. Duncas sa Assemblea Natzionale Sarda, cun s’Assemblea Territoriale sua de Aristanis, at disinnadu sa prima letzione de yoga in sardu. S’initziativa l’ant amparada sa Comuna de Santeru e sa Biblioteca. In sa curnisa galana de Putzu Idu Laura Salaris, linguista esperta, ativista, grandu connoschidora de sas tècnicas orientales de assèliu, maistra de yoga, at imparadu a sos 25 presentes a alenare e a sighire su ritmu e sas dimandas de sa carena, sena olvidare sa bellesa de su raportu chi b’at intre sas pessones e sa terra, sas pessones e su mundu de foras, de su cale nois semus una manifestatzione minore, permitende de torrare a sas raighinas, a su deo prus fungudu, a s’identidade nostra. S’eventu teniat sa punna de giùghere su sardu dae sas pràticas fitianas a sos registros diferentes dae su fitianu, manigende su yoga comente aina de integratzione linguìstica.
Cale est sa finalidade de initziativas che a custa? Est a mustrare chi cada die sa limba creschet, càmbiat, s’adatat finas gràtzias a sos chi sèberant de l’impitare in sos campos de cumpetèntzia pròpia. E tando una borta si podet fàghere una bìsita in sardu a sos logos de Pepinu Mereu in Tonara, una borta una bìsita a sos logos de Sarvadore Satta in Nùgoro, una borta una bìsita a una fàbrica de birra. O, comente in custa acuntèssida, si podet fàghere una sessione de yoga.
(sa redatzione)
Leave a comment