S’11 de abrile, s’Assemblea natzionale sarda at annuntziadu in Casteddu su de bator apuntamentos annuales cun Sa Die de Sardigna, «una festa de pòpulu peri sas carreras», comente at naradu su presidente de s’assòtziu Riccardo Pisu Maxia. Ma àteru b’at in antis de su chi s’at a festare su 28 de abrile. In programma b’est difatis sa rassigna “Isetende sa Die”, un’initziativa chi movet dae bàsciu e chi sos organizadores l’ant definida «unu laboratòriu colletivu de identidades». Ma fintzas «una prataforma aberta chi aunit istòria, arte, sotziedade e cunvìviu» pro mèdiu de unu «programma chi atraessat limbàgios e logos diferentes, essidas urbanas e decostrutziones toponomàsticas, performance artìsticas, projetziones tzinematogràficas, laboratòrios, presentatziones editoriales, fiacoladas, atopos e iscutas de sotzialidade movende dae sos màndigos e dae sa limba sarda». In pagas paràulas, «un’invitu pro pònnere meledos a su presente pro more de unu tempus coladu chi pedit galu boghe e giustìtzia». Sos apuntamentos de “Isetende sa Die” sunt in programma dae su 18 a su 23 de abrile.
Custos addòbios serbint a contare s’istòria de sa Sardigna pro mèdiu de sa chirca iscientìfica e sos limbàgios gràficos e visivos, e su patrimòniu nuràgicu candidadu a èssere unu bene Unesco.
Ma su programma sighit su 26, su 27 e su 28, sa Die mera e sìnchera cun sa solennidade su in sa pratza de Su Cramu.
«Comente Ans – sutalìniant sos organizadores – cherimus chi Sa Die siat una diada de festa pro totu cantos. Torramus a bìvere s’istòria in sos logos protagonistas de sa Sarda Rivolutzione e ammentamus sas acontèssidas de su 28 de abrile de 1794. Milliones de persones afestant a Santu Patrìtziu in intro e in foras de Irlanda. Gasi etotu comente in Olanda cun sa festa de su re o in Catalugna cun sa Diada, Sa Die podet èssere una grandu festa.
Gianfranca Orunesu
Leave a comment