de Antonimaria Pala
Oe apo bistu “Leonardo”, sa rubrica de RAI tres italiana.
Faeddende de Expo ant mentovadu sa candidadura pro sa manifestatzione internatzionale, de sas Istàtuas de Monte Prama comente sinnu.
Pro la segare in curtzu (tantu la potides agatare in retze, sa trasmissione) ant naradu chi est sa manera prus antiga de fàghere custa casta de arte, de totu su Mediterràneu otzidentale. Su giornalista, e sos archeòlogos sardos ant naradu chi su chi assustat est chi sunt bestidos e armados a manera nuràgica, ma sa manu chi los at fatos est istranza e duncas non sarda. In antis de sos fenìcios (comente chi dae pustis de sos nuràgicos siat totu fenìciu) e a sa sigura itita e de cuss’area. Non sunt sardas ca non sunt naturalìsticas e duncas tenent unu canone. Custa creze de istatuària ca est clàssica elaborada e regulada dae un’istile cumpridu e galanu, non potet èssere autòctona (est nòdidu chi sos sardos faghiant petzi barracheddas, Losa, Barùmini, Torralba, S. Cristina… e gasi sighende) ma petzi fata dae gente arribada dae foras.
Galu una borta si tratat de contaminatzione. Sa pesta, finas in s’arte e in s’archeologia sarda como b’est, ca non bastaiant sas mùsicas “contaminadas” e sa literadura porcheddina. S’impestadura comente valore positivu, de marca autocolonialista.
Su bellu est chi fiant sardos sos chi ant faeddadu. Ant naradu chi nche fiat ora de si pònnere de acordu sos acadèmicos posca de trinta annos de inatividade. Deo naro chi si no fiat istadu pro more de sa pressione natzionalista e de s’archeologia lìbera, fiant istadas mòlidas e fatas in prùere cussas istàtuas!
Leonardo sighit faeddende de contaminatzione de ambiente e de drones.
Lis falet unu drone in conca, nessi unu a cada unu, a cussos pessadores e archeòlogos , mannu che a onni gigante nuràgicu. Gasi l’intendent sa manu anzena! Lis falet unu drone… lis falet!
(Foto leada dae Wikipedia)