Fuit s’inglesu “The Observer” su primu a chistionare de “Istrategia de sa tensione”. A su chi nargeit su giornalista Leslie Finer, sa punna fiat sa de fàghere crèschere su livellu de s’iscontru intre “estremismos contràrios” pro chi si nche poderet cròmpere a una furriada reatzionària acabbadora de s’atòngiu caente. Gasi, in cussu merie fritu de su 12 de nadale, una bomba tzocheit in intro de sa Banca natzionale de s’agricultura, in Pratza Fontana, in Milanu, cajonende da morte de 17 pessones (88 is fertos) e inaugurende un’istajone istragìstica concruida cun su degòlliu bolognesu de su 2 de austu de 11 annos a pustis. Is indàgines, ghiadas dae su cummissàriu Luigi Calabresi, moveint deretas conca a is ambientes anarchistas. Pino Pinelli, partigianu de is brigatas “Bruzzi-Malatesta” e ferrovieri, “nche rueit”, tres dies a pustis, dae una ventana de su de bator pranos de sa cuestura meneghina, in ue ddu fiant interroghende. In su 1975 su giùighe D’Ambrosio, assolvende totus is imputados, faeddeit de “malore ativu”. Est a nàrrere, Pinelli non si morgeit, ma nemos ddu morgeit.
màuru piredda
Leave a comment