Unu dispositivu mòbile pro si mantènnere in collegamentu cun sa tzentrale de su 118. Lu sunt ponende in totu sas ambulàntzias de Sardigna.
Finas a como Areus at dadu 270 tàulas informàticas, o infotàulas, siat a sas postatziones de base de sos sugetos cunventzionados, siat a cussas avantzadas de s’Azienda Regionale pro s’Emergèntzia Urgèntzia. In sas chidas chi benint nd’ant a dare àteras 80.
Su sistema digitale cunsentit a s’operadore de sa tzentrale de imbiare a s’ambulàntzia totu sas informatziomes leadas dae su malàidu cando b’est sa rechesta de agiudu, e de las trasmìtere cun un’ischeda chi si podet lèghere in tempus reale cun s’infotàula.
Cando si visualizat s’ischeda si bident totu sos particulares de s’interventu e de sa geolocalizatzione de su malàidu. Su personale de s’ambulàntzia, cando lompet a su logu de s’interventu, pròpiu gràtzias a s’infotàula podet leare, archiviare e imbiare a su dutore de sa tzentrale sos datos anagràficos de su malàidu, leghende su còdighe a barras de sa tèssera sanitària, e ammaniare deretu una cartella clìnica informatizada in ue ponet sos sìntomos e sas manovras de istabilizatzione e reanimatzione chi at fatu, sos paràmetros vitales e istrumentales (pressione, frecuèntzia de su tocheddu cardiàcu) e sas meighinas chi eventualmente l’at dadu.
“Cun su sistema nou sos valores si podent insertare prus in presse chi no iscriende in su pabiru – crarint sos Sistemas Informativos de Areus – S’operadore podet insertare in presse finas sos tràumas chi at agatadu in su malàidu, sos cales posca sunt visualizados in sa bisura interativa de su corpus umanu a disponimentu de su sistema de Primu Sucursu a ue nche tràmudant su malàidu pro lu curare”. In prus, gràtzias a su dispositivu, si podent imbiare fotografias e vìdeos a sa Tzentrale operativa pro descrìere mègius sa situatzione.
Finas a como sa geolocalizatzione in tempus reale fiat possìbile sceti pro sos tres elicòteros: como at a èssere possìbile finas pro sas 27 ambulàntzias avantzadas, chi s’agatant pro su prus in su de sos ospidales, e pro sas 196 postatziones de base, chi s’agatant in totu su terrìtòriu regionale.
(redatzione)
Leave a comment