Eris est essida a campu sa relata “Ecosistema urbano”: un’istùdiu de Legambiente, Ambiente Itàlia e Sole24Ore pro cumprèndere sa calidade de s’ambiente in sas tzitades. Pro la avalorare si sunt impreados degheoto critèrios partzidos in chimbe àreas: àera, arga, abba, ambiente e mobilidade. Sas tzitades analizadas sunt chentu chimbe cabu-de-logos e in Sardigna ant leadu petzi sos bator betzos.
In Itàlia sas tres tzitades prus virtudosas sunt Trento, Règgio Emìlia e Màntova. In sas binti mègius b’at Casteddu, in sa positzione sèighi. Sos setores in ue sa tzitade sarda andat mègius sunt sos trasportos e su birde urbanu. Su resurtu bonu però est produidu massimamente dae nùmeros in sa mèdia o pagu prus artos in belle totus sos setores.
Sa segunda tzitade sarda in sa classìfica est Aristanis e l’agatamus in sa positzione trinta tres. Sos setores in ue b’at prus contivìgiu sunt su solare pùblicu, su biòssidu de azoto in s’àera, sa boddidura diferentziada e sas carreras tziclàbiles.
A sa de chimbantanoe positziones b’at Tàtari chi tenet sa calidade de s’àera mègius intre sas tzitades sardas: totus tres sos indicadores sunt in sas binti positziones a dae in antis. In sos àteros setores però sa tzitade est posta male, mescamente in su setore ambiente. S’ùnicu àteru balore bonu est sa cantidade de passegeris in sos trasportos pùblicos, fintzas si s’oferta non est gasi de primore.
S’ùrtima tzitade sarda est Nùgoro. Su setore contivigiadu mègius est s’arga: pagos sos refudos produidos e bona sa boddidura diferentziada. Àtera boghe chi intrat in sa mègius binti de s’Istadu est sa depuratzione de s’abba. In sos setores de s’ambiente e de sa calidade de s’àera, a s’imbesse, Nùgoro est sa tzitade peus de s’ìsula intrea.
Problemas ecològicos cumpartzidos dae totus sas tzitades sunt su nùmeru de sas veturas a giru e sa paga calidade de sas tubaduras pro s’abba.
Sa base de datos (incarca inoghe pro la bìdere) dat sa possibilidade de annotare s’andanta istòrica de sas tzitades. Sa cosa curiosa est chi duos annos a como sa classìfica fiat diferente meda. Aristanis fiat sa tzitade mègius (sa de noe), sighida dae Nùgoro (sa de trintaghimbe) e in ue Casteddu e Tàtari fiant fatu (sa de barantaghimbe e sa de setanta). Custa mudada manna nos contat de comente sas tzitades ant sufridu da crisi de sa pandemia e sa cantidade de sos fundos gastados pro megiorare sa situatzione urbana.
(redatzione)
Leave a comment