Dae su 30 de cabudanni a su 2 de santugaine est in programma in Piaghe su Alzheimer Fest, chi tenet duas tapas finas in Portu Turres e in Su Masu. A sas 16,30 de su 30 si cumintzat in su palcu foras de s’ex cumbentu de sos Caputzinos. Sa die in fatu est in programma unu pràngiu in collaboratzione cun sa Pro Loco.
In cuddas dies s’ant a esibire sos coros Auser de Li Punti, Volare si può de su sòtziu Parkinson de Tàtari, Voci Bianche Luigi Canepa e in prus Sos Femmineddos de Sènnaru, su grupu folk de Piaghe, s’ispetàculu Ora capisco de Paolo Putzu cun Andrea Schirru e Silvia Follesa, su cuartetu jazz de Massimo Carboni, Mariano Tedde, Paolo Spanu e Gianni Filindeu, sos pitzinnos de sas iscolas de Piaghe.
No ant a mancare interventos de ispetzialistas de sa maladia.
S’anteprima de sa manifestatzione est est in programma su 30, a sas 10,30 in s’Atrio Comita di Torres, in Portu Turres, mentras su 2 a sas 18,30 si serrat in Su Masu in sa pratza de sa crèsia.
S’initziativa est sa Associazione Malattia Alzheimer Sardegna, presèdida dae Pina Ballore, cun su cuntributu printzipale de sa Comuna de Piaghe e àteros cuntributos de sas Comunas de Portu Turres, Su Masu, Ìtiri, Fiolinas, Codronzanu, Unione Comunas de su Coros, pro loco de Piaghe e de Su Masu, Croce Gialla e sòtziu Nessuno Escluso de Piaghe.
Su Alzheimer Fest, sòtziu non profit, est nàschidu in Milanu in su 2017.
(redatzione)
Leave a comment