Foto leada dae nrl.com
In Hamilton, Nova Zelanda, domìniga 15 de freàrgiu ant giogadu s’All Stars sa seletzione de sos indìgenos australianos e sa de sos maoris neozelandesos.
Est sa partida chi sa NRL, National Rugby League, sa lega de rugby a 13 de Austràlia, tzèlebrat dae su 2010 s’identidade de sos pòpulos originàrios de s’istadu e dae su 2019 sa de sos maoris puru, bida sa presèntzia semper prus forte de neozelandesos in su campionadu.
Est istada una partida echilibrada, chi no at mai bidu una de sas duas iscuadras lassende a segus s’àtera.
Sa prima meta, trasformada, dd’at fata sa segunda lìnia Laban pro sos Maoris, chi a su minutu 4 andant 6-0. A su 9’ sos australianos rispondent cun Steep e a su 15’ passant in bantàgiu cun Watson a pustis de una bella atzione de su stand-off Trindall. A sa mesora s’ala maori Watene-Zelezniak regollet unu grabber de Nikora e marcat pro su 10-12, cun Pompey chi faddit sa trasformatzione.
A su 45’ atzione sìmile, e cun trasformatzione faddida, ma custa borta de sos australianos: grabber de Trindall pro s’ala Addo-Carr.
Deghe minutos a coa su tallonadore neozelandesu Toelau intrat de fortza a suta de sos palos. Sa trasformatzione de Hiroti giughet su puntègiu a 16-16.
Est s’ùrtima marcadura de sa partida. Dae issara sas iscuadras faghent a borta a borta cun su set de ses possessos peròmine ma non nche resurtant a nche colare s’aversàriu.
S’All Stars finit duncas in paridade. Su Trofeu abarrat in Nova Zelanda, bidu ca sos maoris aiant bintu s’ùrtima editzione.
Sa copa est dedicada a Artur Beetson, mortu in su 2011, su primu giogadore de ratza aborìgena a èssere istadu capitanu, in sos annos ‘70, de una natzionale australiana de cale 8 Mooney, si siat ispòrt.
A sos maoris finas su prèmiu pro su mègius giogadore in campu: sa medàllia Preston Campbell, intitulada a aterunu ex giogadore aborìgenu, babbu de Jayden, su nùmeru 15 in campu, est andada a s’estremu Kini.
Maoris: 1 Kini, 2 Fifita, 3 McLean, 4 Hiroti, 5 Watene Zelezniak, 6 Nikoll Clokstad (in sa foto), 7 Martin, 8 Mooney, 9 Dockar Clay, 15 Hunt, 11 Nikora, 12 Laban, 13 Fisher Harris; intercàmbios 14 Toelau, 16 Riki, 17 Chan, 18 Waitere; riservas 19 Pompey, 20 Arthars.
Indìgenos de Austràlia: 1 Fuller, 2 Addo-Carr, 3 Wighton, 4 Ramien, 5 Khan Pereira, 6 Trindall, 7 Hynes, 10 Mitchell, 9 Watson, 16 Lahrs, 11 Duncan, 12 Patston, 13 Puru; intercàmbios 14 Fogarty, 15 Campbell, 17 Steep, 18 Pascoe; riservas 19 Tohi, 20 Woolf.
(gianni muroni)
Leave a comment