– de Alessandro Dessi –
“Ricette di Sardegna” est su blog e pàgina de Facebook chi in belle 5 annos est resèssidu a otènnere una renèssida ispantosa, cun agiumai 250.000 “m’agradat”. A palas suas ddu at unu pitzocu chi si narat Alioska Mancosu. Nàschidu in su 1973 (su nùmene islavu curiosu suo dipendet dae su fatu chi sa mama sua, santugiainesa doc, si narat Anastasia), Alioska est crèschidu in Santu ‘Engiu, at istudiadu giurisprudèntzia in is duas universidades sardas e a pustis de sa “làurea” est mòvidu a Bartzellona. At bìvidu e traballadu in sa capitale catalana pro 5 annos e in cue est istadu finas presidente de is giòvanos sardos de Ispànnia. Dae tando est andadu e torradu pro annos medas intre de s’ìsula, Roma e paritzas tzitades de Itàlia e de Europa, esertzitende atividades de marketing e comunicatzione. Dae agiumai 15 annos traballat cun renèssida manna in su setore de s’innovatzione. “Deo cunsideru a mie etotu, in carchi manera, comente su jaju de Facebook in Sardigna de livellu professionale”, narat, “ca so istadu su primu chi aiat declaradu Facebook comente istrumentu de marketing prioritàriu pro s’ìsula”.
Comente naschet “Ricette di Sardegna”?
Prus o mancu 5 annos a oe, fiat agiumai unu machine su de cunsiderare Facebook comente istrumentu istratègicu pro fàghere comunicatzione de manera professionale e sistemàtica. S’abrìtziu meu fiat lòmpidu cando, isvilupende is servìtzios de comunicatzione pro sa sienda “Pasta di Sardegna”, aia abertu a manera ispontànea sa pàgina de Facebook sua chi dae luego aiat àpidu una renèssida manna manna. Sa cunseguèntzia de totu custu, fiat su naschimentu de un’initziativa autònoma chi aiat comente finalidade sua totu su chi pertocat sa Sardigna de unu livellu gastronòmicu e non.
Ti dd’isetaias custa istrossa de “m’agradat” pro una pàgina de Facebook chi s’òcupat de retzetas?
Ricette di Sardegna non s’òcupat de retzetas isceti. Est de facto su propulsore prus de importu subra de sa promotzione de sa Sardigna in generale. A oe tenet belle 40 bortas in prus de visualisatziones de su portale de sa RAS.
Comente cambiada sa vida tua a pustis de su sutzessu ispantosu de initziativa?
Est cambiada in mègius, ca pro mèdiu de Ricette di Sardegna apo afortiadu sa connoschèntzia de sa terra mea e s’est ismanniada sa credibilidade mea e de s’agentzia cosa mea de livellu professionale.
Come ti dd’ispricas su boom de sa gastronomia in is librerias, in is edìculas e in tv?
Est comente si finas a oe non nos esseremus castiados a s’isprigu e pro custu no aìamus sa possibilidade de bìdere chie semus.
“S’ermosura at a sarvare su mundu”, naraiat su prìntzipe Miškin in “S’idiota”de Dostoevskij. Ite a pàrrere tuo at a sarvare s’ìsula nostra?
Sa gana de fàghere cosa.
Comente ti dda immàginas una Sardigna 2.0?
Un’ìsula in ue s’80% de sa popolatzione at a traballare a manera direta o indireta in su turismu; at a chistionare is duas limbas fatidicas: s’inglesu e ispanniolu; at a àere potentziadu su sistema formativu suo leende.ddu a istandards anglo-sassones.
Su lìberu cult iscritu dae Pepe Corongiu si narat “Il sardo: una lingua “normale”. Ite naras de custu assertu?
Pro me su sardu est una limba normale ca est sa limba de is origines meas, e in prus est s’idioma in su cale is sardos depent investire, ca est parte de importu de s’identidade nostra.
Comente dda bides sa situatzione polìtica in tempus de oe?
Finas a cando no amus a lòmpere a una classe de livellu polìticu forte e determinada intro su Parlamentu, at a abarrare isbatùliu in Sardigna subra de ite est sa polìtica e de ite si podet fàghere pro is sardos.
In su benidore amus a bìdere Alioska Mancosu che assessore subra de sa massaria o de su turismu?
Pro amare sa Sardigna e a fines de ghetare elementos de innovatzione intro de su setore de sa massaria e de su turismu, prus chi de assessores bonos bisongiamus de impresàrios mannos . Deo ispero de èssere unu de custos.
Pro àere un’initziativa renèssida sunt prus de importu is ideas de cumentzu o su chi ddas giughent a in antis?
Su chi ddas giughet a in antis.
Giallozafferano.it, su primu blog italianu de retzetas, est istadu trisinadu paris in su progetu de s’ExpoMilano 2015. Pro ite sa RAS no at fatu su matessi cun ricettedisardegna.it?
Ca s’erba de su bighinu est semper sa prus birde.
Cale at a èssere s’evolutzione de Ricette di Sardegna in su benidore?
In su 2016 semus parende pro lòmpere a 600.000 sighidores, pro presentare sa versione annoada de su portale e pro lòmpere a s’organizatzione de su primu “Sardinian Food Festival” in Roma.
Depemus isetare.nos unu libru de retzetas firmadu dae te?
Amus manuale vàrios de retzetas giai prontos. Deo creo chi a maju de ocannu ddu at a àere sa prima publicatzione.
Virginia Woolf sustenniat chi “a palas de unu òmine mannu ddu istat semper una femina manna “. Balet pro te etotu?
Prus chi una femina manna a palas de Alioska Mancosu ddu est Maria Francesca: s’amore de sa vida mea.
Leave a comment