-de Nicola Merche –
Su partidu prus mannu de Sardigna non funtzionat e is giòvanos democràticos si riunint pro agatare una solutzione. Una cosa est crara: s’atòbiu ddu at aparitzadu su sòtziu Agorà, nùmene chi èvocat su logu deputadu a esertzitare sa democratzia in sa Grètzia antiga. Agorà si movet e a lestru ant publicadu unu vìdeu chi at tentu fama manna e de aici est arribadu fintzas a Renzi chi, postu in mesu in paris a is àteros polìticos, paret non apat agradèssidu meda.
In unu aposentu prenu prenu in su Teatru Màssimu de Casteddu aiant abertu, in mese de capudanni, is traballos de sa prima de unas cantu de assembleas, in totu Sardigna, pro isterrere sa dibata a pitzus de su progetu PD. In Tàtari chenàbura passada, su 21, ant replicadu s’esperièntzia casteddaia cun unu atòbiu chi at prentu su teatru S’Arza.
Sa opinione de fundamentu est chi serbit bentu nou in su PD: sa assemblea regionale atuale est delegitimada ca at faddidu e non est istada capassa de nominare unu segretàriu nou, difatis, su problema est chi unu partidu chena de segretàriu non andat a in antis. Sa gente est istraca de sa gherra intra de milli currentes internas e is militantes, giòvanos prus ca totu, rapresentativos de ònnia àrea de su partidu, ant otentu unu cungressu istraordinàriu chi at a èssere convocadu in su mese de freàrgiu.
Amministradores, tesseradas, dirigentes sunt intervènnidos pro nàrrere chi su PD depet mudare meda ca non chistionat prus de Sardigna e non ascurtat prus is sardos. Duncas tocat a bogare is chi sunt istracos de ghiare su partidu e a pònnere gente noa cun fortza e coràgiu; su cungressu est su logu adecuadu pro chistionare de partidu e de riformas istitutzionales.
Intra de totus is interventos in Tàtari ant chistionadu a prima Valeria Fadda consigiera comunale de Tàtari chi at abertu is traballos, Dolores Lai dirigente PD regionale, Massimo Pintus presidente natzionale Ecodem, Alessandro Cossu consigieri comunale de Berchidda, Fabio Pinna dirigente provitziale de su PD.
In Casteddu su primu interventu fiat cuddu de Yuri Marcialis assessore a s’isport de su comunu de Casteddu pustis cuddu de Guido Portoghese presidente de su consìgiu comunale de Casteddu. Interventos de importu cuddos de Francesco Piludu consigieri comunale de Cuartu Sant’Aleni, de Davide Burchi segretàriu federale de s’Ogiastra, de Gianluigi Piras consigieri comunale de Jersu, de Alessio Mandis sìndigu de Gonnos Tramatza e segretàriu de su PD de sa provìntzia de Aristanis.
Su Sulcis-Igresiente fiat presente cun Daniele Reginali segretàriu federale e consigieri comunale de Igrèsias, Mauro Usai presidente de su consìgiu comunale de Igrèsias e segretàriu regionale de is giòvanos democràticos e cun Pietro Morittu consigieri comunale de Carbònia e professionista chi traballat puru in sa segreteria de s’assessoradu regionale de is trasportos.
De significu is interventos de Morittu chi in Tàtari portat is saludos a s’assemblea e cunfirmat is tesis casteddajas; in Casteddu aiat serradu is traballos narende: “ Bolemus cramare su pòpulu de is primàrias a detzidere e a elègere una classe dirigente noa. Tocat a costruire una proposta.”
Isperemus chi sa classe dirigente democràtica, giòvana e noa, potzat donare unu contributu de importu pro risolvere sa chistione linguìstica sarda chi, in s’època de is deretos tziviles, risultat semper prus discriminatòria e frutu istòricu de polìticas inadecuadas de una classe polìtica delegitimada.
Leave a comment