B’at una novidade in s’agioramentu nou de Whatsapp. Una novidade chi pertocat su mundu de s’intelligèntzia artifitziale e chi essit a campu cun unu chircu asulu serente a su cumandu pro comintzare una tzarrada noa. Cun una apoddigada in cue, difatis, s’aberit una cunversatzione cun su chatbot Meta AI, permitende s’interatzione cun punnas diferentes. Ma sende chi su nùmene est Meta AI, custu cheret nàrrere chi sa cosa no est interessende Whatsapp ebbia ma, a bellu a bellu, totu su chi b’est in intro de s’azienda de tziu Zuckerberg (e duncas finamentas Messenger e Instagram). Ma comente est chi funtzionat custu chatbot? Simple: pro mèdiu de su tastu, “faeddamus” deretu cun s’assistente chi movet dae su modellu de linguàgiu propietàriu e a còdighe abertu Llama 3.2.
Custas sas funtzionalidades suas: generatzione de testos in coerèntzia cun su cuntestu de impreu; curretziones pro istèrrere frases e paràgrafos sighende inditos pretzisos cunforma a s’argumentu e su tràgiu; curretziones de testos giai iscritos; intregu de cussìgios pro sa pianificatzione de unu progetu etc. E diamus pòdere impreare Meta AI, cramende·lu in agiudu, finamentas in intro de una chat de grupu pro mèdiu de su cumandu “@meta ai”.
Torrende·lu a nàrrere, custa funtzionalidade est presente in sas versiones agiornadas de Whatsapp e duncas non b’at bisòngiu de istare a su chirca chirca si non bi l’amus. Petzi non b’est. Ma chie imbetzes la tenet e non nde cheret s’intesa? A su presente non b’at possibilidade de la disabilitare, de nche la bogare. Est cosa probàbile chi luego, cun àteros agiornamentos noos, si potzat ricùrrere a custa optzione. Pro como nudda, in cue est e in cue abbarrat. Si pròpiu unu no la cheret impreare, est bastante a sighire s’impreu de custa messagìstica cumportende·nos che chi Meta Ai non b’esseret.
Gianfranca Orunesu
Leave a comment